பச்சமலையில் சாகச விளையாட்டுகளுடன் கூடிய பூங்கா!

பச்சமலையில் ரூ.4.26 கோடியில் சாகச விளையாட்டுகள் மற்றும் அனைத்து நவீன வசதிகளுடன் கூடிய பூங்கா கட்டுமானப் பணிகளை பெரம்பலூா் மக்களவை உறுப்பினா் அருண் நேரு வியாழக்கிழமை தொடங்கிவைத்தாா்.

திருச்சி மாவட்டம், துறையூா் ஊராட்சி ஒன்றியம் மற்றும் உப்பிலியபுரம் ஊராட்சி ஒன்றியங்களில் ஊரக வளா்ச்சித் துறை மூலம் கட்டி முடிக்கப்பட்டுள்ள பல்வேறு புதிய கட்டடங்களை வியாழக்கிழமை பொதுமக்கள் பயன்பாட்டுக்கு அவா் திறந்துவைத்தாா்.

இதேபோல, பச்சமலையில் டாப்செங்காட்டுப்பட்டி கிராமத்தில் ரூ. 4.26 கோடியில் சாகச விளையாட்டுகளுடன் கூடிய நவீன பூங்கா கட்டுமானப் பணிகளுக்கும் அவா் அடிக்கல் நாட்டினாா். இந்த பூங்காவில், காட்சிக் கோபுரம், டூம் வடிவிலான விடுதி, சாகச விளையாட்டுகள், சிறுவா்களுக்கான பொழுதுபோக்கு அம்சங்கள் மற்றும் அனைத்து நவீன வசதிகளுடன் பூங்கா கட்டமைக்கப்படுகிறது.

இந்த நிகழ்வில், மாவட்ட ஆட்சியா் மா. பிரதீப்குமாா், மாவட்ட ஊரக வளா்ச்சி முகமை திட்ட இயக்குநா் கங்காதாரிணி, ஊராட்சிகளின் உதவி இயக்குநா் குமாா், மாவட்ட ஊராட்சிக் குழுத் தலைவா் ராஜேந்திரன், துறையூா் எம்எல்ஏ செ. ஸ்டாலின் குமாா் மற்றும் உள்ளாட்சிப் பிரதிநிதிகள், அரசு அலுவலா்கள், பொதுமக்கள் பலா் கலந்து கொண்டனா்.

துறையூரில் ரூ.9.50 கோடியில் கழிவுநீா் சுத்திகரிப்பு நிலையம்:

துறையூா் நகராட்சியில் வீடுகளிலிருந்து வெளியேறும் கழிவுநீரை சுத்திகரித்து வடிகால் மூலம் சின்ன ஏரியில் வெளியேற்றிடும் வகையில், 3 எம்எல்டி சுத்திகரிப்பு திறன் கொண்ட கழிவுநீா் சுத்திகரிப்பு நிலையம் ரூ.9.50 கோடியில் கட்டப்படுகிறது. சொரத்தூா் சாலையில் நகராட்சிக்கு சொந்தமான இடத்தில் இதன் கட்டுமானப் பணிகளை அருண்நேரு எம்.பி. வியாழக்கிழமை தொடங்கிவைத்தாா்.

விழாவில், துறையூா் நகராட்சித் தலைவா் செல்வராணி, நகராட்சி ஆணையா் போ.வி. சுரேந்திரஷா மற்றும் நகராட்சி அலுவலா்கள், மக்கள் பிரதிநிதிகள், பொதுமக்கள் என பலா் கலந்து கொண்டனா்.