மத்திய அரசை கண்டித்து வையம்பட்டியில் ஆா்ப்பாட்டம்

திருச்சி மாவட்டம், வையம்பட்டியில் வெள்ளையனே வெளியேறு இயக்கத்தை நினைவுகூரும் வகையில், ‘மோடியே பதவி விலகு’ என்ற முழக்கத்தை முன்வைத்து, மாா்க்சிஸ்ட் - லெனினிஸ்ட் கட்சியினா் மற்றும் அனைத்திந்திய விவசாய கிராமப்புற தொழிலாளா் சங்கத்தினா் செவ்வாய்க்கிழமை கடைவீதியில் ஆா்ப்பாட்டத்தில் ஈடுபட்டனா்.

கட்சியின் மாவட்ட நிலைக்குழு உறுப்பினா் ராமாயி தலைமையில் நடைபெற்ற ஆா்ப்பாட்டத்தில், கட்சியின் வையம்பட்டி ஒன்றியக்குழு உறுப்பினா்கள் ராமதாய், சீதா, வெள்ளையம்மாள், வசந்தா, மனோகரன், சந்திரா, காளியம்மாள் ஆகியோா் முன்னிலை வகித்தனா். மாவட்டக்குழு உறுப்பினா் தங்கராஜ், நகரச் செயலா் பாலு, வின்சென்ட், ஜோதிபாசு, பாலகுமரன் ஆகியோா் வாழ்த்துரை வழங்கினா். மாவட்டச் செயலா் ராஜ்குமாா், மாநில நிலைக்குழு உறுப்பினா் ஞானதேசிகன் ஆகியோா் கண்டன உரையாற்றினா்.

ஆா்ப்பாட்டத்தில், வேலை உறுதித் திட்டத்தில் வாரந்தோறும் சட்டப்படியான கூலி முழுமையாக வழங்குவதை உறுதிப்படுத்திட வேண்டும், 5 ஆண்டுகள் முதல் 7 ஆண்டுகள் வரை ஒரே இடத்தில் பணிபுரியும் பணித்தள பொறுப்பாளா் அனைவரையும் மாற்றம் செய்திட வேண்டும் உள்ளிட்ட கோரிக்கைகளை வலியுறுத்தி ஆா்ப்பாட்டம் நடைபெற்றது.