நவயுக் ரயிலில் 22 கிலோ புகையிலைப் பொருள்கள் பறிமுதல்

திருச்சி வந்த நவயுக் ரயிலில் 22 கிலோ புகையிலைப் பொருள்கள் பறிமுதல் செய்யப்பட்டது தொடா்பாக போலீஸாா் விசாரிக்கின்றனா்.

ஜம்மு காஷ்மீரின் மாதா வைஷ்னோ தேவி காத்ரா ரயில் நிலையத்தில் இருந்து திருநெல்வேலிக்கு நவயுக் விரைவு ரயில் இயக்கப்படுகிறது. இந்த ரயில் ஞாயிற்றுக்கிழமை பிற்பகல் 2.30 மணிக்கு திருச்சி சந்திப்பு ரயில் நிலையத்தின் ஒன்றாவது நடைமேடையில் வந்து நின்றது.

அப்போது, அந்த ரயிலில் உணவுப் பாதுகாப்புத் துறை அதிகாரிகள் ரயில்வே போலீஸாருடன் இணைந்து புகையிலைப் பொருள்கள் கடத்தல் தொடா்பான ஆய்வு மேற்கொண்டனா்.

அப்போது, அந்த ரயிலில் கேட்பாரற்று கிடந்த பையை சோதனையிட்டபோது அதில் அரசால் தடைசெய்யப்பட்ட 22 கிலோ புகையிலைப் பொருள்கள் இருந்தது கண்டறியப்பட்டது. இதையடுத்து, அவற்றை உணவுப் பாதுகாப்புத் துறை அதிகாரிகள் பறிமுதல் செய்தனா்.

இதுகுறித்து கண்டோன்மென்ட் காவல் நிலையத்தில் உணவு பாதுகாப்புத் துறை அலுவலா் அன்புசெல்வன் அளித்த புகாரின்பேரில், போலீஸாா் வழக்குப் பதிந்து விசாரணை நடத்தி வருகின்றனா்.