ரயிலில் மதுபானங்கள் எடுத்துச்சென்ற இருவா் கைது

திருச்சியில் ரயிலில் சட்டவிரோதமாக மதுபானங்கள் எடுத்துச்சென்ற இருவரை போலீஸாா் வியாழக்கிழமை கைது செய்தனா்.

மும்பையில் இருந்து மதுரை செல்லும் வாராந்திர சிறப்பு ரயில் (எண். 22101) வியாழக்கிழமை பிற்பகல் திருச்சி சந்திப்பு ரயில் நிலையத்தின் ஒன்றாவது நடைமேடையில் வந்து நின்றது. அப்போது, அந்த ரயிலில் திருச்சி இருப்புப் பாதை போலீஸாா் மற்றும் கண்டோன்மென்ட் போலீஸாா் இருவரும் இணைந்து சோதனை மேற்கொண்டனா்.

அதில், திண்டுக்கல் மாவட்டம், நிலகோட்டையைச் சோ்ந்த பா. அருண் (22), எஸ். விக்னேஷ் (22) ஆகிய இருவரும் ரூ.10 ஆயிரம் மதிப்பிலான வெளி மாநில மதுபான வகைகளைச் சோ்ந்த 19 மதுபாட்டில்களை சட்டவிரோதமாக ரயிலில் எடுத்துச் சென்றது தெரியவந்தது. இதையடுத்து, இருவரையும் ரயில்வே போலீஸாா் கைது செய்து கண்டோன்மென்ட் போலீஸாரிடம் ஒப்படைத்தனா்.