32 ஆண்டுகளுக்கு பிறகு புதிய பாடத்திட்டத்தில் தேர்வு

வேலூர், அக். 8: தொழிற்கல்வி மாணவர்கள் 32 ஆண்டுகளுக்கு பிறகு முதன்முறையாக மாற்றியமைக்கப்பட்ட புதிய பாடத்திட்டத்தின்படி மார்ச் 2012ல் அரசு பொதுத் தேர்வு எழுத உள்ளனர்.

 இதுகுறித்து தமிழ்நாடு மேல்நிலைப்பள்ளி தொழிற்கல்வி ஆசிரியர் கழக பொதுச் செயலர் செ.நா. ஜனார்த்தனன் வெளியிட்ட அறிக்கை:

 66 பாடப்பிரிவுகளாக இருந்த பாடங்கள் இப்போது 12 பாடப்பிரிவுகளாக மாற்றியமைக்கப்பட்டது.

 இதில், 9 பாடப்பிரிவுகள் புதிய பாடத்திட்டத்தின்படியும், 3 பாடப்பிரிவுகள் பழைய பாடத்திட்டத்தின்படியும் தொடருகிறது.

 புதியதாக வடிவமைக்கப்பட்டுள்ள பாடத்திட்டப்படி 9 பாடப்பிரிவுகளுக்கு புதிய வினாத்தாள் முறை நடைமுறைப்படுத்துவது வரவேற்கத்தக்கது. ஆனால், பழைய பாடத்திட்டங்களில் 3 பாடங்களுக்கு வினாத்தாள் முறை மாற்றப்படாமல் பழைய முறையிலேயே தொடர வேண்டும்.

 32 ஆண்டுகளாக மாற்றியமைக்கப்படாமல் உள்ள மூன்று பாடத்திட்டங்களை இக்கல்வியாண்டிலேயே தற்கால தேவைக்கேற்ப மாற்றியமைத்து புதிய பாடத்திட்டங்களை வகுத்து புத்தகங்கள் வழங்க தமிழக அரசு நடவடிக்கை எடுக்கவேண்டும் என்றார் அவர்.