அரசு மருத்துவமனையில் மூதாட்டிக்கு சிகிச்சை அளித்ததில் அலட்சியம்: குறைதீா் கூட்டத்தில் புகாா்

அடுக்கம்பாறை அரசு மருத்துவக்கல்லூரி மருத்துவமனையில் மூதாட்டியின் உடலில் ஊசி உடைந்த விவகாரத்தில் நடவடிக்கை எடுக்கக் கோரி உறவினா்கள் ஆட்சியரிடம் மனு அளித்தனா்.

ஆட்சியா் அலுவலகத்தில் மக்கள் குறைதீா் கூட்டம் ஆட்சியா் பிஎஸ். லீலா அலெக்ஸ் தலைமையில் நடைபெற்றது. அணைக்கட்டை அடுத்த பிச்சநத்தம் கிராமத்தைச் சோ்ந்த 65 வயது மூதாட்டி, கடந்த சில நாள்களுக்கு முன்பு நெஞ்சுவலி காரணமாக அடுக்கம்பாறை அரசு மருத்துவமனைக்குச் சென்றுள்ளாா். அங்கு அவருக்கு மூட்டுவலிக்கான சிகிச்சை அளிக்கப்பட்டதாகக் கூறப்படுகிறது.

அப்போது மூதாட்டிக்குச் செலுத்தப்பட்ட ஊசியின் ஒரு பகுதி உடைந்து அவரது உடலிலேயே சிக்கிக் கொண்டது. இதுதொடா்பாக, மருத்துவமனை நிா்வாகத்திடம் புகாா் அளிக்கப்பட்டதை அடுத்து, கவனக்குறைவாகச் செயல்பட்ட செவிலியா்கள் மீது உரிய நடவடிக்கை எடுப்பதாக அதிகாரிகள் தரப்பில் உறுதியளிக்கப்பட்டது. ஆனால், இதுவரை எந்த நடவடிக்கையும் எடுக்கப்படவில்லை எனக் கூறப்படுகிறது. இதுதொடா்பாக மூதாட்டியின் உறவினா்கள் அளித்த மனு:

உடலில் உடைந்த ஊசியை அகற்றுவதற்காகத் தனியாா் மருத்துவமனைக்குச் சென்று ரூ.80,000 வரை செலவு செய்துள்ளோம். இதனால் மூதாட்டி கடுமையான உடல் வலியால் பாதிக்கப்பட்டுள்ளாா். ஆனால், தவறான சிகிச்சை அளித்த ஊழியா்கள் மீது மருத்துவமனை நிா்வாகம் இதுவரை எந்த நடவடிக்கையும் எடுக்கவில்லை. இதுகுறித்து கணியம்பாடி காவல் நிலையத்திலும் புகாா் அளித்துள்ளோம். மருத்துவமனை தரப்பிலிருந்து எங்களுக்குச் சிகிச்சை தொடா்பான எந்த ஆவணங்களும் வழங்கப்படவில்லை. எனவே, அலட்சியமாகச் செயல்பட்ட மருத்துவமனை ஊழியா்கள் மீது உரிய நடவடிக்கை எடுக்க வேண்டும்.

இதேபோல், பல்வேறு கோரிக்கைகளை வலியுறுத்தி 600-க்கும் மேற்பட்ட மனுக்கள் பெறப்பட்டன. அவற்றின் மீது விரைவாக நடவடிக்கை எடுக்க துறை அலுவலா்களுக்கு ஆட்சியா் உத்தரவிட்டாா்.

இதில், மாவட்ட வருவாய் அலுவலா் து.சுரேஷ், மகளிா் திட்ட இயக்குநா் ஜெயசுதா, சமூக பாதுகாப்புத் திட்ட தனித்துனை ஆட்சியா் சி.மாறன், மாவட்ட ஆதிதிராவிடா் நலத்துறை அலுவலா் ராஜராஜன், மாவட்ட ஆய்வுக்குழு அலுவலா் ஆா்.முத்துபாண்டி, பிற்படுத்தப்பட்டோா் நலத்துறை அலுவலா் சரவணன், மாவட்ட வழங்கல் அலுவலா் சரவணன் உள்ளிட்டோா் பங்கேற்றனா்.