மத்திய, மாநில அரசுகளின் திட்டங்கள்: 6 நாள் விழிப்புணா்வு, கண்காட்சி

மத்திய, மாநில அரசுகளின் திட்டங்கள், பெண்ணுரிமைகள் குறித்த 6 நாள்கள் விழிப்புணா்வு, கண்காட்சி புதுச்சேரியில் திங்கள்கிழமை (மாா்ச் 4) தொடங்கி வரும் 9-ஆம் தேதி வரை நடைபெறுகிறது. பத்திரிகைத் தகவல் அலுவலகம் மற்றும் மத்திய மக்கள் தொடா்பகத்தின் கூடுதல் தலைமை இயக்குநா் மா.அண்ணாதுரை புதுச்சேரியில் உள்ள தனியாா் திருமண மண்டபத்தில் செய்தியாளா்களை சந்தித்துக் கூறியதாவது: சென்னையில் செயல்பட்டு வரும் இந்திய அரசின் மத்திய மக்கள் தொடா்பகம் சாா்பில் திங்கள்கிழமை (மாா்ச் 4) முதல் 9-ஆம் தேதி வரை 6 நாள்களுக்கு மகளிா் சக்தி, பெண்களின் தன்னுரிமைகளும் பாலியல் சமத்துவமும் என்ற தலைப்பில் ஒருங்கிணைந்த விழிப்புணா்வு நிகழ்ச்சி புதுச்சேரி பாரதி வீதி, திருவள்ளுவா் நகரில் உள்ள சாய்பாபா திருமண மண்டபத்தில் நடைபெறுகிறது. முதல்வா் என். ரங்கசாமி இந்த நிகழ்ச்சியை தொடங்கி வைக்கிறாா். கண்காட்சி, பல்வேறு துறை சாா்ந்த செய்திகள், அரசின் மக்கள் நலன் சாா்ந்த குறிப்புகள், விளக்கங்கள், மத்திய, மாநில அரசுகளின் திட்டங்கள் காட்சிப்படுத்தப்படும். நாள்தோறும் கலை நிகழ்ச்சிகள் நடைபெறும். மக்கள் தொடா்பகத்தின் மண்டல அலுவலகங்கள் தமிழகம், புதுச்சேரி, அந்தமான் நிக்கோபா் தீவுகளில் செயல்படுகின்றன. அரசின் செயல் திட்டங்களை மக்களுக்கு எடுத்து செல்வது தான் இந்த அலுவலகத்தின் முக்கியப் பணி என்றாா் மா.அண்ணாதுரை.