தொழிலாளி வீட்டில் திருட்டு

கடலூர் அருகே படகு கட்டும் தொழிலாளி வீட்டை உடைத்து பணம் மற்றும் நகையை மர்ம நபர்கள் திருடிச் சென்றனர்.

கடலூர் முதுநகர் பச்சையாங்குப்பத்தைச் சேர்ந்தவர்கள் ராஜா (41), அவரது தம்பி ஆனந்தன் (38). இருவரும் படகு கட்டும் தொழில் செய்து வருகின்றனர். வியாழக்கிழமையன்று ஆனந்தன் சீர்காழி அருகே பழையாறில் நடைபெற்ற கோயில் விழாவுக்காக குடும்பத்துடன் சென்றார்.

வெள்ளிக்கிழமை காலையில் ராஜாவின் மனைவி வீட்டைவிட்டு வெளியே வந்தபோது, ஆனந்தனின் வீடு உடைக்கப்பட்டு திறந்த நிலையில் இருப்பதை பார்த்து அதிர்ச்சியடைந்தார். இதுகுறித்து ராஜா கடலூர் முதுநகர் போலீஸில் புகார் செய்தார்.

தகவலறிந்த ஆனந்தனும் பழையாறில் இருந்து ஊர் திரும்பினார்.

முன்னதாக வியாழக்கிழமை இரவு வீட்டின் கேட்டை உடைத்து உள்ளே புகுந்த மர்ம நபர்கள் முன்பக்க கதவை திறந்துள்ளனர். பின்னர், வீட்டுக்குள் இருந்த 3 பீரோக்களையும் உடைத்து, அதிலிருந்த 4 சவரன் தங்க நகை, ரூ.15 ஆயிரம் ரொக்கம் ஆகியவற்றை திருடிச் சென்றது தெரியவந்தது. இதுகுறித்து முதுநகர் போலீஸார் விசாரித்து வருகின்றனர். மேலும், கைரேகை நிபுணர்களும் வரவழைக்கப்பட்டு தடயங்கள் சேகரிக்கப்பட்டன.