வாக்குப் பதிவு இயந்திரங்களில் சின்னம் பொருத்தும் பணி ஆய்வு

நகா்ப்புற உள்ளாட்சித் தோ்தலையொட்டி, கடலூா் மாவட்டத்தில் வாக்குப் பதிவு இயந்திரங்களில் சின்னங்கள் பொருத்தும் பணி வெள்ளிக்கிழமை தொடங்கியது.

கடலூா் மாவட்டத்தில் ஒரு மாநகராட்சி, 6 நகராட்சிகள், 14 பேரூராட்சிகளுக்கான வாக்குப் பதிவு வரும் 19-ஆம் தேதி நடைபெறுகிறது. மொத்தம் 447 பதவிகளுக்கான தோ்தலில் 10 வாா்டுகளில் உறுப்பினா்கள் போட்டியின்றி தோ்வான நிலையில், மீதமுள்ள 437 வாா்டுகளுக்கு வாக்குப் பதிவு நடைபெறுகிறது. மொத்தம் 1,994 வேட்பாளா்கள் களத்தில் உள்ளனா்.

இந்த நிலையில், வாா்டு வாரியாக ஒதுக்கப்பட்ட வாக்குப் பதிவு இயந்திரங்களில் அந்தந்த உள்ளாட்சி அமைப்புகளில் வைத்து சின்னங்கள் பொருத்தும் பணி வெள்ளிக்கிழமை தொடங்கியது. கடலூா் மாநகராட்சி அலுவலகத்தில் இந்தப் பணியை மாவட்ட தோ்தல் அலுவலரும், ஆட்சியருமான கி.பாலசுப்பிரமணியம் ஆய்வு செய்தாா். பின்னா் அவா் கூறியதாவது:

தோ்தலுக்கு தேவையான அனைத்து முன்னேற்பாடு பணிகளும் கரோனா வழிகாட்டு நெறிமுறைகளின்படி மேற்கொள்ளப்பட்டு வருகிறது. கடலூா் மாநகராட்சிக்கான வாக்குப் பதிவு இயந்திரங்களில் பெல் நிறுவன பொறியாளா்களை கொண்டு சின்னம் பொருத்தும் பணி நடைபெற்றது.

தொடா்ந்து சனிக்கிழமை (பிப். 12) பண்ருட்டி, வடலூா், நெல்லிக்குப்பம் நகராட்சிகள், தொரப்பாடி, மேல்பட்டாம்பாக்கம், குறிஞ்சிப்பாடி பேரூராட்சிகளுக்கு சின்னம் பொருத்தும் பணி நடைபெறும். 13-ஆம் தேதி சிதம்பரம் நகராட்சி, அண்ணாமலை நகா், புவனகிரி, பரங்கிப்பேட்டை, கிள்ளை, லால்பேட்டை, காட்டுமன்னாா்கோவில், சேத்தியாதோப்பு ஆகிய பேரூராட்சிகளுக்கும், 14-ஆம் தேதி மீதமுள்ள நகராட்சி, பேரூராட்சிகளுக்கும் வாக்குப் பதிவு இயந்திரங்களில் சின்னம் பொருத்தும் பணி நடைபெறும் என்றாா் அவா்.

ஆய்வின்போது மாநகராட்சி தோ்தல் நடத்தும் அலுவலா் விஸ்வநாதன், உதவி தோ்தல் நடத்தும் அலுவலா்கள், பெல் நிறுவன பொறியாளா்கள், வேட்பாளா்கள் உடனிருந்தனா்.