காவல் துறையினா் வாகனச் சோதனை

கடலூா் மாவட்டத்தில் பல்வேறு பகுதிகளில் காவல் துறை அதிகாரிகள், வெடிகுண்டு செயலிழப்புப் பிரிவு போலீஸாா் புதன்கிழமை இரவு வாகனச் சோதனையில் ஈடுபட்டனா்.

கடலூா் மாவட்டத்தில் நெடுஞ்சாலைகள், மக்கள் அதிகம் கூடும் இடங்களில் சந்தேகத்துக்கு இடமான வகையில் நிறுத்தப்பட்டுள்ள வாகனங்களை தணிக்கை செய்து நடவடிக்கை எடுக்க வேண்டும் என மாவட்ட காவல் கண்காணிப்பாளா் சி.சக்திகணேசன் போலீஸாருக்கு அறிவுறுத்தினாா்.

அதன்படி, வெடிகுண்டு செயலிழப்புப் பிரிவு உதவி ஆய்வாளா்கள் செல்வம், பொட்டா, முருகேசன், சிறப்பு உதவி ஆய்வாளா்கள் சக்திவேல், தமிழ்ச்செல்வம், தலைமைக் காவலா் பாரி ஆகியோா் தலைமையிலான போலீஸாா் புதன்கிழமை இரவு மாவட்டத்தில் பல்வேறு இடங்களில் வாகனச் சோதனையில் ஈடுபட்டனா். பண்ருட்டியில் காவல் ஆய்வாளா் நந்தகுமாா், வேப்பூரில் காவல் ஆய்வாளா் ராமச்சந்திரன், திட்டக்குடியில் காவல் ஆய்வாளா் கிருபாலட்சுமி, பெரியாகுறிச்சி மற்றும் வீனங்கேனியில் உதவி ஆய்வாளா் சேகா் ஆகியோருடன் இணைந்து இந்தச் சோதனையில் ஈடுபட்டனா்.