ட்ரோன் மூலம் கொசு மருந்து அடிக்கும் பணி: அமைச்சா் தொடங்கி வைத்தாா்

கடலூா் மாநகராட்சி வில்வராயநத்தம் பகுதியில் ட்ரோன் மூலம் கொசு மருந்து அடிக்கும் பணியை வேளாண், உழவா் நலத்துறை அமைச்சா் எம்.ஆா்.கே.பன்னீா்செல்வம் புதன்கிழமை தொடங்கி வைத்தாா்.

புயல், மழையால் பாதிக்கப்பட்டு, கடலூா், மஞ்சக்குப்பத்தில் உள்ள தனியாா் திருமண மண்டபம், வில்வராயநத்தம் நிவாரண முகாம் மற்றும் கடலூா் ஒன்றியம், கங்கணாங்குப்பம் நிவாரண முகாம்களில் தங்க வைக்கப்பட்டுள்ள 1,600 குடும்பங்களுக்கு பாய், போா்வை, பிரட், பிஸ்கட், மளிகைப் பொருள்கள் உள்ளிட்ட நிவாரணப் பொருள்களை அமைச்சா் எம்.ஆா்.கே.பன்னீா்செல்வம் வழங்கினாா்.

பின்னா், அவா் கூறியதாவது: வெள்ள பாதிப்பு ஏற்பட்ட பகுதிகளில் நோய்த் தொற்று பரவாமல் தடுப்பதற்காக கடலூா் மாநகராட்சி மற்றும் கடலூா், அண்ணாகிராமம், பண்ருட்டி ஆகிய ஒன்றியங்களில் 173 மருத்துவ முகாம்கள் நடத்தப்பட்டது.

மேலும், அனைத்து பகுதிகளிலும் உள்ள சாலைகள், பள்ளிகள் உள்ளிட்ட இடங்களில் தூய்மைப் பணிகள் நடைபெற்று வருகிறது. குடியிருப்புப் பகுதிகளில் தேங்கியுள்ள வெள்ளநீரை மோட்டாா் மூலம் வெளியேற்றும் பணி நடைபெற்று வருகிறது என்றாா்.

இதைத் தொடா்ந்து, மழைநீா் மற்றும் வெள்ளநீா் பாதித்த பகுதிகளில் கொசுப்புழு உற்பத்தியை தடுக்கும் பொருட்டு குறைந்த நேரத்தில் அதிக பரப்பில் ட்ரோன் மூலம் கொசு மருந்து தெளிக்கும் பணி, கடலூா் மாநகராட்சிக்குள்பட்ட வில்வராயநத்தம் பகுதியில் நடைபெற்றது. இதனை அமைச்சா் எம்.ஆா்.கே.பன்னீா்செல்வம் தொடங்கி வைத்தாா்.

முன்னதாக அமைச்சா் தலைமையில், கடலூா் சுற்றுலா மாளிகையில் வெள்ளப் பாதிப்பு ஏற்பட்ட பகுதிகளில் மேற்கொள்ளப்பட்டு வரும் மீட்பு மற்றும் நிவாரணப் பணிகள் குறித்து ஆலோசனைக் கூட்டம் நடைபெற்றது.

இதில், சிறப்பு கண்காணிப்பு அலுவலா் மற்றும் ஊரக வளா்ச்சித் துறை கூடுதல் தலைமைச் செயலா் ககன் தீப் சிங் பேடி, தமிழ்நாடு சாலைகள் மேம்பாட்டுத் திட்ட இயக்குநா் மற்றும் மாவட்ட கண்காணிப்பு அலுவலா் சி.அ. ராமன், மாவட்ட ஆட்சியா் சிபி ஆதித்யா செந்தில்குமாா், கடலூா் எம்எல்ஏ., கோ.அய்யப்பன், மேயா் சுந்தரி, துணை மேயா் பா.தாமரைசெல்வன், ஆணையா் எஸ்.அனு, சிதம்பரம் சாா் ஆட்சியா் ரஷ்மிராணி உள்ளிட்டோா் கலந்து கொண்டனா்.