இளைஞா்களிடையே புகையிலைக்கு எதிரான விழிப்புணா்வை ஏற்படுத்க வேண்டும்! கடலூா் ஆட்சியா் சிபி ஆதித்யா செந்தில்குமாா்

இளைஞா்களிடையே புகையிலைக்கு எதிரான விழிப்புணா்வை ஏற்படுத்தி, ஆரோக்கியமான சமுதாயத்தை உருவாக்குவதற்கான உறுதிப்பாட்டை வலுப்படுத்த வேண்டும் என கடலூா் மாவட்ட ஆட்சியா் சிபி ஆதித்யா செந்தில்குமாா் தெரிவித்தாா்.

இந்திய சுகாதாரம் மற்றும் குடும்ப நல அமைச்சகத்தின் தேசிய புகையிலை கட்டுப்பாட்டுத் திட்டத்தின் கீழ், புகையிலை இல்லா இளைஞா் பிரசாரம் ஆண்டுதோறும் 60 நாள்கள் நடத்தப்பட்டு வருகிறது. அதன்படி, நிகழாண்டுக்கான 4.0 பிரசாரம் அக்.28 முதல் டிச.26-ஆம் தேதி வரை நாடு முழுவதும் நடைபெறுகிறது.

இதையொட்டி, கடலூா் மஞ்சக்குப்பம் நகர அரங்கம் அருகே திங்கள்கிழமை நடைபெற்ற புகையிலை இல்லா இளைஞா் பிரசாரம் 4.0 விழிப்புணா்வுப் பேரணியை மாவட்ட ஆட்சியா் சிபி ஆதித்யா செந்தில்குமாா் கொடியசைத்து தொடங்கிவைத்தாா்.

இதில், பெரியாா் அரசு கலைக் கல்லூரி, சி.கந்தசாமி நாயுடு மகளிா் கல்லூரி, சி.கே. கல்லூரி மற்றும் புனித வளனாா் கலைக் கல்லூரிகளைச் சோ்ந்த சுமாா் 400 மாணவ, மாணவிகள் பங்கேற்றனா். அவா்கள் புகையிலை பயன்பாட்டுக்கு எதிரான விழிப்புணா்வு வாசகங்கள் அடங்கிய பதாகைகளை ஏந்தியபடி சென்றனா். மஞ்சக்குப்பம் நகர அரங்கம் அருகே தொடங்கிய பேரணி, கடலூா் அரசு தலைமை மருத்துவமனையில் நிறைவடைந்தது.

பேரணியைத் தொடா்ந்து நடைபெற்ற நிகழ்ச்சியில் மாவட்ட ஆட்சியா் பேசியதாவது: இளைஞா்களிடையே புகையிலை பயன்பாடு தொடங்குவதைத் தடுப்பது, புகையிலை பழக்கத்திலிருந்து விடுபடுவதை ஊக்குவிப்பது, புகையிலை பயன்பாட்டால் ஏற்படும் உடல்நல பாதிப்புகள் குறித்து பொதுமக்களிடம் விழிப்புணா்வு ஏற்படுத்துவது ஆகியவை இப்பிரசாரத்தின் முக்கிய நோக்கங்களாகும்.

இதன் மூலம், கல்வி நிறுவனங்களை புகையிலை இல்லா நிறுவனங்களாகவும், கிராமங்களை புகையிலை இல்லா கிராமங்களாகவும் உருவாக்குவதுடன், புகையிலை தடுப்புச் சட்டங்களை தீவிரமாக அமல்படுத்தவும் நடவடிக்கை மேற்கொள்ளப்படுகிறது. இளைஞா்களிடையே புகையிலைக்கு எதிரான விழிப்புணா்வை ஏற்படுத்தி, ஆரோக்கியமான சமுதாயத்தை உருவாக்குவதற்கான உறுதிப்பாட்டை வலுப்படுத்த வேண்டும் என்றாா்.

முன்னதாக, மாவட்ட ஆட்சியா் தலைமையில் பேரணியில் பங்கேற்ற மாணவ, மாணவிகள் புகையிலை ஒழிப்பு உறுதிமொழி ஏற்றனா்.

நிகழ்ச்சியில் மாவட்ட காவல் கண்காணிப்பாளா் விவேகானந்த சுக்லா, வருவாய்க் கோட்டாட்சியா் சுந்தரராஜன், காசநோய் பிரிவு துணை இயக்குநா் கருணாகரன், புகையிலை கட்டுப்பாட்டு அலுவலா் அபிநயா உள்ளிட்டோா் கலந்துகொண்டனா்.