விருத்தாசலம் நகராட்சி அலுவலகத்தில் தூய்மைப் பணியாளா்கள் தா்னா

விருத்தாசலம் நகராட்சியில் பணியாற்றும் ஒப்பந்த தூய்மைப் பணியாளா்களுக்கு 14 ஆண்டுகளுக்கும் மேலாக வருங்கால வைப்பு நிதி (இபிஎஃப்), தொழிலாளா் அரசு காப்பீட்டுத் தொகை (இஎஸ்ஐ) முறையாக செலுத்தப்படவில்லை எனக் கூறி, 100-க்கும் மேற்பட்டோா் நகராட்சி அலுவலகத்தில் வியாழக்கிழமை தா்னாவில் ஈடுபட்டனா்.

விருத்தாசலம் நகராட்சியில் 100-க்கும் மேற்பட்ட தூய்மைப் பணியாளா்கள் ஒப்பந்த அடிப்படையில் கடந்த 14 ஆண்டுகளுக்கும் மேலாக பணியாற்றி வருகின்றனா். இவா்களின் ஊதியத்தில் இருந்து வருங்கால வைப்பு நிதி மற்றும் தொழிலாளா் அரசு காப்பீட்டுக்காக பிடித்தம் செய்யப்படும் தொகை, உரிய காலத்தில் சம்பந்தப்பட்ட கணக்குகளில் செலுத்தப்படாமல் காலதாமதம் செய்யப்பட்டு வருவதாகக் கூறப்படுகிறது.

இதுதொடா்பாக நகராட்சி அதிகாரிகளிடம் பலமுறை மனு அளித்தும், பல்வேறு கட்ட போராட்டங்களை நடத்தியும் உரிய தீா்வு கிடைக்கவில்லையாம்.

இதையடுத்து, தங்களது வருங்கால வைப்பு நிதி மற்றும் தொழிலாளா் அரசு காப்பீட்டுத் தொகையை முறையாகச் செலுத்த வேண்டும், நிலுவையில் உள்ள தொகை குறித்த முழுமையான கணக்கு விவரங்களை வழங்க வேண்டும் என்பன உள்ளிட்ட கோரிக்கைகளை வலியுறுத்தி, நகராட்சி அலுவலக வளாகத்தில் தா்னா மற்றும் காத்திருப்புப் போராட்டத்தில் தூய்மைப் பணியாளா்கள் ஈடுபட்டனா்.

அப்போது, நீண்ட காலமாக நிலவி வரும் இப்பிரச்னைக்கு அரசு மற்றும் நகராட்சி நிா்வாகம் உரிய நடவடிக்கை எடுத்து, நிலுவைத் தொகைகளைப் பெற்றுத் தர வேண்டும் என தூய்மைப் பணியாளா்கள் முழக்கங்களை எழுப்பினா்.

பின்னா் நகராட்சி அதிகாரிகள் போராட்டத்தில் ஈடுபட்டவா்களிடன் பேச்சுவாா்த்தை நடத்தி உரிய நடவடிக்கை எடுப்பதாக உறுதியளித்தனா். இதை ஏற்று போராட்டத்தில் ஈடுபட்டவா்கள் கலைந்து சென்றனா்.

பணிக்குச் செல்லாமல் தூய்மைப் பணியாளா்கள் போராட்டத்தில் ஈடுபட்டதால், விருத்தாசலம் நகராட்சிப் பகுதிகளில் குப்பை அகற்றும் பணிகள் பாதிக்கப்பட்டன.