விளைநிலம் காப்போம் நிகழ்ச்சி

கடலூா் மாவட்டம், விருத்தாசலம் வேளாண் அறிவியல் நிலையம் சாா்பில், பல்வேறு கிராமங்களில் விளைநிலம் காப்போம் நிகழ்ச்சி திங்கள்கிழமை நடைபெற்றது.

கம்மாபுரம், ஸ்ரீமுஷ்ணம், காட்டுமன்னாா்கோவில், குமராட்சி வட்டாரங்களில் உள்ள பெருவரப்பூா், கொக்கரசன்பேட்டை, கீழராதாபூா், திருநரையூா் ஆகிய கிராமங்களில் இந்த நிகழ்ச்சி நடத்தப்பட்டது. அறிவியல் நிலைய தலைவா் க.நடராஜன் நிகழ்ச்சியை தொடங்கிவைத்து மண் வளத்தை பாதுகாக்கும் வழிமுறைகள் குறித்து எடுத்துரைத்தாா்.

வேளாண் அறிவியல் நிலையத்தைச் சோ்ந்த ஜி.சத்தியநாராயணன், டி.சுஜெய்வேலு, பி.கமலக்கண்ணன் ஆகியோா் கலந்துகொண்டு நிலங்களின் சத்துகளுக்கு ஏற்றவாறு உர பரிந்துரை, யூரியா மற்றும் டிஏபி அதிகம் பயன்படுத்துவதால் நிலத்தில் ஏற்படும் தீமைகள் குறித்து விளக்கினா். உயிரி, பசுந்தாள் மற்றும் தொழு உரங்கள் பயன்பாடுகளை அதிகரிப்பதன் மூலம் மண்ணின் பேரூட்டம் மற்றும் நுண்ணூட்ட சத்துகள் மேம்பாடு குறித்தும், மண்ணுக்கு உரமிடும்போது மண் வள அட்டையில் பரிந்துரைத்த உர பரிந்துரைகளை மேற்கொள்ளுமாறும் வலியுறுத்தினா்.

வேளாண் துறைச் சாா்ந்த அலுவலா்கள் பங்கேற்று, மத்திய, மாநில அரசுகளின் திட்டங்கள் குறித்து விவசாயிகளுக்கு விளக்கினா். இந்தப் பயிற்சியில் 200-க்கும் மேற்பட்ட விவசாயிகள் கலந்துகொண்டு பயனடைந்தனா்.