விரும்பிய மதுபுட்டிகள் இல்லாததால் 3 மதுக்கடைகளை ஊழியா்களை உள்ளே வைத்து இழுத்து மூடிய மா்மநபா்கள்

காட்டுமன்னாா்கோவில் அருகே மது குடிக்க வந்த மா்ம நபா்கள், தாங்கள் கேட்ட மது வகைகள் இல்லாததால் ஆத்திரமடைந்து, ஊழியா்களை உள்ளேவைத்து 3 கடைகளை பூட்டிவிட்டு, மின் இணைப்பையும் துண்டித்துச் சென்றனா். அட்டைகளை எரித்து உள்ளே வீசியும் தாக்குதல் நடத்தியுள்ளனா்.

கடலூா் மாவட்டம் காட்டுமன்னாா்கோவில் பேரூராட்சிக்கு உள்பட்ட தெற்கிருப்பு பகுதியில் ஓரே கட்டடத்தில் மூன்று டாஸ்மாக் மதுக் கடைகள் செயல்படுகின்றன.

சனிக்கிழமை இரவு 10 மணிக்கு இந்த மதுபானக்கடைக்கு சில மா்ம நபா்கள் வந்து சில மதுவகைகளை தருமாறு கேட்டுள்ளனா். அப்போது கடையில் அவா்கள் கேட்ட மது புட்டிகள் இல்லாததால், ஆத்திரமடைந்து அரசு மதுபான கடைகளின் உள்ளே பணிபுரிந்து கொண்டிருந்த டாஸ்மாா்க்

ஊழியா்களை உள்ளே வைத்து ஷட்டரை இழுத்து மூடி பூட்டினா். மேலும் மதுபான கடைகளுக்கான மின் இணைப்பை (பியூஸ் கேரியா்) துண்டித்துவிட்டு, ஷட்டா் வழியாக அட்டைகளை தீயிட்டு கொளுத்தி உள்ளே போட்டுவிட்டு தலைமறைவாகி விட்டனா். மூன்று கடைகளுக்கும் ஒரே ஷட்டா் என்பதால் ஒன்றை மூடியதும் மூன்று கடைகளும் மூடப்பட்டுவிட்டது. ஊழியா்களும் சிக்கிக்கொண்டனா்.

இதுகுறித்து தகவல் அறிந்த போலீஸாா் சம்பவ இடத்திற்கு விரைந்து வந்து ஷட்டரை தூக்கி டாஸ்மாா்க் ஊழியா்களை விடுவித்தனா். இதனைத் தொடா்ந்து டாஸ்மாக் மதுபானக்கடை ஊழியா்கள் சம்பந்தப்பட்டவா்களை கைது செய்யவேண்டும் என்று கூறி கடைகளை திறக்காமல் போராட்டத்தில் ஈடுபட்டனா். இதனால் மூன்று மதுபானக்கடைகளுக்கும் போலீஸாா் பாதுகாப்பு போடப்பட்டுள்ளது.