பழங்குடியினருக்கான வீடுகள்: எம்எல்ஏ ஆய்வு

காட்டுமன்னாா்கோவில் அருகே பழங்குடியினருக்காக கட்டப்பட்ட வீடுகளின் நிலை குறித்து, சட்டப்பேரவை உறுப்பினா் எல்.இ.ஜோதிமணி செவ்வாய்க்கிழமை ஆய்வு மேற்கொண்டாா்.

காட்டுமன்னாா்கோவில் அருகே ஓமாம்புலியூா் கிராமத்தில் கொள்ளிடம் ஆற்றின் கரையோரத்தில் சுமாா் 16 குடும்பங்களைச் சோ்ந்த பழங்குடியினருக்கு கடந்த 2022 -ஆம் ஆண்டு 16 குடும்பங்களைச் சாா்ந்தோருக்கு ஒவ்வொரு குடும்பத்திற்கும் சுமாா்

ரூ 4 லட்சத்து 66 ஆயிரம் வீதம் சுமாா் ரூ 73 லட்சம் மதிப்பீட்டில் விரிவான பழங்குடியினா் மேம்பாட்டு திட்டத்தின் கீழ் வீடு கட்டுவதற்கு அனுமதி அளிக்கப்பட்டு கட்டுமானப் பணிகள் தொடங்கின. இந்த வீடுகள் முழுமையாக கட்டி முடிக்காததால் பயனாளிகளுக்கு வழங்கப்படவில்லை. மேலும் புதிதாக கட்டப்பட்டுள்ள வீடுகளுக்கு செல்வதற்கு சாலை , மின்இணைப்பு , குடிநீா் , வசதிகள் இல்லை. எனினும் பயனாளிகளை ஒப்பந்ததாரா் தொடா்ந்து புதிய குடியிருப்புகளில் குடியேற வலியுறுத்தி வந்தாா். இதுகுறித்த புகாரின் பேரில், சட்டப்பேரவை உறுப்பினா் எல்,இ.ஜோதிமணி செவ்வாய்க்கிழமை காலை மாளிகை மேடு கிராமத்திற்கு சென்று குடியிருப்பு பகுதிகளை ஆய்வு மேற்கொண்டதில் எவ்வித அடிப்படை வசதியும் இல்லாததை அறிந்து, இது குறித்து உடனடியாக மாவட்ட ஆட்சியரிா் மற்றும் அமைச்சா்களுக்கு தகவல் தெரிவித்து பிரச்னைக்குத் தீா்வுகாண வலியுறுத்தினாா்.

இதுகுறித்து பயனாளி சக்திவேல் தெரிவிக்கையில், கடந்த 4 ஆண்டுகளாக போராடி வருகிறோம். ஆனால் ஒப்பந்ததாரா் வீடுகளை முழுமையாக கட்டி எங்களுக்கு ஒப்படைக்கவில்லை. மேலும் பணம் கேட்கிறாா் என்றாா்.