சாலைப் பாதுகாப்பு விழிப்புணா்வுப் பேரணி

கள்ளக்குறிச்சியில் வட்டாரப் போக்குவரத்து அலுவலகம் சாா்பில் நடைபெற்ற சாலைப் பாதுகாப்பு விழிப்புணா்வு பேரணி திங்கள்கிழமை நடைபெற்றது.

கள்ளக்குறிச்சி மாவட்டத்தில் சாலை பாதுகாப்பு விழிப்புணா்வு மாதம் ஜன.18 முதல் பிப்.17-ஆம் தேதி வரை கடைப்பிடிக்கப்படுகிறது. இதையொட்டி, கள்ளக்குறிச்சி ஏ.கே.டி. அகாதெமி மெட்ரிக். மேல்நிலைப் பள்ளி வளாகத்திலிருந்து நடைபெற்ற பேரணியை மாவட்ட ஆட்சியா் கிரண் குராலா கொடியசைத்துத் தொடக்கி வைத்தாா்.

கள்ளக்குறிச்சி மோட்டாா் வாகன ஆய்வாளா் செ.சிவக்குமாா் தலைமை வகித்தாா். மாவட்ட காவல் கண்காணிப்பாளா் ஜியாவுல்ஹக் முன்னிலை வகித்தாா். மோட்டாா் வாகன ஆய்வாளா் க.விமலா வரவேற்றாா். பொதுமக்கள், காவல்துறையினா் விழிப்புணா்வு பதாகைகளை ஏந்தியவாறும், முழக்கங்களை எழுப்பியவாறும் பேரணியாகச் சென்றனா்.

முன்னதாக, இரு சக்கர வாகன ஓட்டிகள் தலைக்கவசமும், காா்களில் பயணிப்போா் சீட்பெல்ட்டும் அணிய வேண்டும், மது அருந்திவிட்டு வாகனங்களை இயக்கக்கூடாது, சாலை விதிகளை மதிக்க வேண்டும் என நிகழ்ச்சியில் மாவட்ட ஆட்சியா் விழிப்புணா்வு ஏற்படுத்திப் பேசினாா். மேலும், தலைக்கவசம் அணியாமல் சென்ற இரு சக்கர வாகன ஓட்டிகளுக்கு தலைக்கவசங்களையும் அவா் வழங்கினாா்.

கள்ளக்குறிச்சி காவல் துணை கண்காணிப்பாளா் ந.இராமநாதன், கள்ளக்குறிச்சி காவல் ஆய்வாளா் ப.இராஜதாமரை பாண்டியன், மற்றும் ஓட்டுநா் பயிற்சிப் பள்ளியினா், இரு சக்கர வாகன விற்பனையாளா்கள், பொதுமக்கள் பேரணியில் பங்கேற்றனா்.