"பாரதியார் சாலையில் வாகனங்களை நிறுத்த வசதி தேவை'

காரைக்கால் பாரதியார் சாலையில் வாகனங்கள் நிறுத்தவும், ஒருவழிப் பாதை விதியை மக்கள் கடைபிடிக்க விழிப்புணர்வு ஏற்படுத்தவும் நடவடிக்கை எடுக்குமாறு காவல்துறையினரிடம் வலியுறுத்தப்பட்டுள்ளது.

காரைக்கால் போக்குவரத்து காவல் ஆய்வாளர் லெனின்பாரதி, உதவி ஆய்வாளர் முத்துசாமி ஆகியோரை காரைக்கால் மாவட்ட மனிதநேய மக்கள் கட்சிப் பொருளாளர் அ.ராஜாமுகமது, தமுமுக நிர்வாகிகள் வியாழக்கிழமை சந்தித்தனர்.

காரைக்கால் நேரு வீதி, காமராஜர் சாலையில் ஒரு வழிப்பாதை அமலில் உள்ளது. இந்த ஒருவழிப் பாதையில் தடை செய்யப்பட்ட வாகனங்கள் (கனரக வாகனங்கள்) விதிகளை மீறி பயணிக்கிறது. இதனால், மிதிவண்டியில் பள்ளி செல்லும் மாணவ மாணவிகள், குழந்தைகளை ஏற்றிச் செல்லும் பெற்றோர் உள்ளிட்டோர் பாதிக்கப்படுகின்றனர்.

எனவே, ஒருவழிப் பாதையில் போதிய விழிப்புணர்வு பலகைகள் வைத்து, போலீஸாரைக் கொண்டு வாகனங்களைக் கட்டுப்படுத்த வேண்டும். காரைக்கால் பாரதியார் சாலையில் அண்மையில் ஆக்கிரமிப்புகள் அகற்றப்பட்டன. சாலையோரத்தில் வாகனங்கள் நிறுத்துமிடம் என்பதை குறிக்கும் வகையில் கோடுகள் போட வேண்டும்.

விபத்தைத் தடுக்கும் வகையிலான மின்னொளி ஸ்டிக்கர்கள் சாலையின் முக்கியப் பகுதியில் பதிக்க வேண்டும். விபத்துகளைக் கட்டுப்படுத்த இம்மாதிரி நடவடிக்கைகளை போக்குவரத்துக் காவல் நிர்வாகம் எடுக்க வேண்டுமென வலியுறுத்தினர்.