பாரதிதாசன் பாடல்கள் ஒப்பித்தல் போட்டி

புதுவை தெற்கு மாநில திமுக இலக்கிய அணி சார்பில், பாரதிதாசன் பாடல்கள் ஒப்பித்தல் போட்டி ஞாயிற்றுக்கிழமை நடைபெற்றது.
முன்னாள் முதல்வர் அண்ணாவின் பிறந்த நாளை முன்னிட்டு,  பள்ளி, கல்லூரி மாணவ, மாணவிகளுக்கான பாரதிதாசன் பாடல்கள் ஒப்பித்தல் போட்டி ஆண்டுதோறும் நடத்தப்பட்டு வருகிறது.  அதன்படி, நிகழாண்டுக்கான போட்டி  புதுச்சேரி மறைமலையடிகள் சாலை வெங்கட்டசுப்பா ரெட்டியார் சிலை அருகில் உள்ள தனியார் விடுதியில் பள்ளி மாணவ, மாணவிகளுக்கு தனியாகவும், கல்லூரி மாணவ, மாணவிகளுக்கு தனியாகவும் போட்டிகள் நடைபெற்றன.
புதுவை தெற்கு மாநில திமுக அமைப்பாளர் இரா.சிவா எம்.எல்.ஏ. தலைமை வகித்து போட்டியைத் தொடக்கிவைத்தார்.  மாநில இலக்கிய அணி நிர்வாகிகள் எம்.எஸ். ராஜா (தலைவர்), அமைப்பாளர் பி.டி. பன்னீர்செல்வம், பொருளாளர் ந. ராஜேந்திரன், துணைத் தலைவர்கள் ஜி.என்.ஸ்ரீதர், ஆர்.கே.கலிவரதன், துணை அமைப்பாளர்கள் அருணகிரி, கலியசாமி, தர்மராஜ், புரவலர் ஆளவந்தார் ஆகியோர் முன்னிலை வகித்தனர்.
போட்டியில் அரசு மற்றும் தனியார் பள்ளி, கல்லூரிகளைச் சேர்ந்த மாணவர்கள் சுமார் 500-க்கும் மேற்பட்டோர் பங்கேற்று தங்களது திறமைகளை வெளிப்படுத்தினர்.  இந்தப் போட்டிகளின் ஒருங்கிணைப்பாளராக தமிழ்ச் சங்கப் பொருளாளர் சீனு.மோகன்தாஸ், சிறப்பு நடுவர் குழு நெறியாளர்களாக வேல்முருகன், சீனு.வேணுகோபால்,  தமிழ்ச் சங்கச் செயலர் பாலசுப்ரமணியன், திருவளவன், இளங்கோவன், அப்துல் மஜீத், கலியபெருமாள், கவிபூஞ்சோலை ஆகியோர் தலைமையிலான குழுவினர் செயல்பட்டு, போட்டிகளில் சிறந்து விளங்கிய மாணவ, மாணவர்களைத் தேர்வு செய்தனர்.
போட்டிகளில் பங்கேற்ற மாணவ,  மாணவிகள் அனைவருக்கும் சான்றிதழ் மற்றும் பரிசுகள் வழங்கப்பட்டன. புதுச்சேரி மாவட்ட அளவில் வெற்றி பெற்ற பள்ளி மாணவர்களுக்கு தனியாகவும், கல்லூரி மாணவர்களுக்கு தனியாகவும் முதலாம் பரிசாக ரூ. 5 ஆயிரம், இரண்டாம் பரிசாக ரூ. 3 ஆயிரம், மூன்றாம் பரிசாக ரூ. 2 ஆயிரம், ஆறுதல் பரிசாக ஐந்து பேருக்கு தலா ரூ. 1,500 வழங்கப்பட்டன. 
போட்டியாளர்களுக்கான முதல் பரிசுகள், இறுதிப் போட்டிகள் நடைபெறும் சென்னை அண்ணா அறிவாலயத்தில் வழங்கப்படும். இரண்டாம்,  மூன்றாம் பரிசுகள் மற்றும் ஆறுதல் பரிசுகள் அவரவர் முகவரிக்கு முரசொலி அறக்கட்டளையின் சார்பில் அஞ்சல் மூலம் அனுப்பி வைக்கப்படும்.