புதுவையில் மத்திய அரசின் இலவச அரிசி திட்டம் தொடக்கம்

புதுவை மாநிலத்தில் கரோனா நிவாரணமாக மத்திய அரசு அறிவித்த 5 கிலோ உணவு தானியத் திட்டத்தின் கீழ், சிவப்பு நிற குடும்ப அட்டைதாரா்களுக்கு தலா 5 கிலோ அரிசி வழங்கும் திட்டத்தை துணைநிலை ஆளுநா் (பொ) தமிழிசை சௌந்தரராஜன் சனிக்கிழமை தொடக்கிவைத்தாா்.

நாடு முழுவதும் கரோனா தொற்றின் 2-ஆவது அலை அதிகரித்து, பெரும் அச்சுறுத்தலை ஏற்படுத்தி வருகிறது. தொற்றைக் கட்டுப்படுத்த பொதுமுடக்கம் உள்ளிட்ட கட்டுப்பாடுகளால் மக்களின் வாழ்வாதாரம் பெரிதும் பாதிக்கப்பட்டுள்ளது.

இந்த இக்கட்டான சூழலில், ஏழை மக்களின் நலன் கருதி, மத்திய அரசு ‘பிரதான் மந்திரி கரீப் கல்யாண் அன்னயோஜனா’ திட்டத்தின் கீழ், மே, ஜூன் மாதங்களுக்கு தலா 5 கிலோ அரிசி இலவசமாக வழங்கப்படும் என அறிவித்தது.

இந்தத் திட்டத்தின்படி, புதுவை மாநிலத்தில் வறுமைக் கோட்டுக்குக் கீழ் உள்ள குடும்பங்களுக்கு (சிவப்பு நிற குடும்ப அட்டைதாரா்கள்) இலவச அரிசி வழங்கப்படவுள்ளது. அதன்படி, 5 கிலோ அரிசி வீதம், இரண்டு மாதங்களுக்கு 10 கிலோ இலவச அரிசி வழங்கப்படும். இதன் மூலம், புதுவை மாநிலத்தில் சுமாா் ஒரு லட்சத்து 75 ஆயிரம் குடும்பங்கள் பயனடைவா்.

புதுச்சேரி கதிா்காமம் அரசு பெண்கள் மேல்நிலைப் பள்ளியில், மத்திய அரசின் இலவச அரிசி வழங்கும் திட்டத் தொடக்க விழா சனிக்கிழமை நடைபெற்றது.

இந்த நிகழ்வில் துணைநிலை ஆளுநா் (பொ) தமிழிசை செளந்தரராஜன் கலந்து கொண்டு, திட்டத்தைத் தொடக்கி வைத்து பொதுமக்களுக்கு இலவச அரிசியை வழங்கினாா்.

அப்போது, அரசின் நிவாரணப் பொருள்கள் பொதுமக்களுக்கு தொடா்ந்து கிடைக்கவும், நலத் திட்டங்கள் வழங்கவும் நடவடிக்கை எடுக்கப்பட்டுள்ளதாக ஆளுநா் தெரிவித்தாா்.

நிகழ்ச்சியில் தொகுதி எம்எல்ஏ கே.எஸ்.பி.ரமேஷ், குடிமைப் பொருள் வழங்கல் துறைச் செயலா் உதயகுமாா் உள்ளிட்டோா் கலந்து கொண்டனா்.