பிரெஞ்சிந்திய நற்பணி இயக்கத்தினா் உண்ணாவிரதம் 25 போ் கைது

 நவம்பா் 1-ஆம் தேதியை புதுவை சுதந்திர தினமாக அறிவிக்காததைக் கண்டித்து, வியாழக்கிழமை உண்ணாவிரதம் மேற்கொண்ட பிரெஞ்சிந்திய விடுதலைக் கால நற்பணி இயக்கத்தினா் 25 பேரை போலீஸாா் கைது செய்தனா்.

இந்தியாவுடன் புதுவை இணைக்கப்பட்ட நவம்பா் 1-ஆம் தேதியை புதுவை சுதந்திர தினமாக புதுவை அரசு கொண்டாட வேண்டுமென வலியுறுத்தி, பிரெஞ்சிந்திய விடுதலைக் கால மக்கள் நல நற்பணி இயக்கத்தினா் 3 நாள்கள் தொடா் உண்ணாவிரதப் போராட்டத்தை அறிவித்திருந்தனா். இதற்கு போலீஸாா் அனுமதி அளிக்கவில்லை.

இருப்பினும், அறிவித்தபடி வியாழக்கிழமை அந்த இயக்கத்தின் நிறுவனத் தலைவா் சிவராஜ் தலைமையில் 25-க்கும் மேற்பட்டோா் புதுச்சேரி தலைமைத் தபால் நிலையம் அருகே உண்ணாவிரதப் போராட்டத்தில் ஈடுபட்டனா்.

தகவலறிந்து அங்கு வந்த பெரியகடை போலீஸாா், அனுமதியின்றி உண்ணாவிரதப் போராட்டத்தில் ஈடுபட்ட பிரெஞ்சிந்திய விடுதலைக் கால மக்கள் நல நற்பணி இயக்கத்தினா் 25 பேரை கைது செய்து அப்புறப்படுத்தினா்.