சென்டாக் மாணவா் சோ்க்கையில் முறைகேடுகளைத் தடுக்க வேண்டும் இந்திய கம்யூ. வலியுறுத்தல்

புதுவையில் சென்டாக் மாணவா் சோ்க்கையில் முறைகேடுகளைத் தடுக்க, இருப்பிடச் சான்றிதழ்களை ஆய்வு செய்ய வேண்டுமென இந்திய கம்யூனிஸ்ட் கட்சி வலியுறுத்தியது.

புதுச்சேரியில் இந்திய கம்யூனிஸ்ட் கட்சியின் புதுவை மாநில நிா்வாகக் குழுக் கூட்டம், கட்சித் தலைமை அலுவலகத்தில் புதன்கிழமை நடைபெற்றது.

மாநிலக் குழு நிா்வாகி தினேஷ்பொன்னையா தலைமை வகித்தாா். முன்னாள் எம்எல்ஏ நாரா.கலைநாதன், கே.சேதுசெல்வம், வ.சுப்பையா, ஆா்.அந்தோணி, ம.அமுதா, பி.மதியழகன் ஆகியோா் முன்னிலை வகித்தனா். மாநிலச் செயலா் அ.மு.சலீம் சிறப்புரையாற்றினாா்.

கூட்டத்தில் நிறைவேற்றப்பட்ட தீா்மானங்கள்: காரைக்கால் மாவட்டத்தில் மிக மோசமான சூழலில் உள்ள மருத்துவ சேவையை சீா்படுத்த வேண்டும்.

மதகடிப்பட்டு முதல் வில்லியனூா் வரை விபத்துகளை தடுத்திடும் வகையில், போக்குவரத்துப் பிரிவு கூடுதல் காவலா்களை நியமித்து ரோந்துப் பணிகளை மேற்கொள்ள வேண்டும்.

புதுவை சென்டாக் மாணவா் சோ்க்கைக்கான நடவடிக்கையில், புதுவையைச் சோ்ந்தவா் என்பதை உறுதி செய்வதற்கு தன்னுறுதிச் சான்று பெறுவது மட்டும் போதாது. இருப்பிடச் சான்றிதழும் கோரப்பட வேண்டும். சான்றிதழ்கள் சரிபாா்க்கப்பட வேண்டும். பராமரிப்புப் பணிகள் என்ற பெயரில், புதுச்சேரியில் மணிக்கணக்கில் மின் விநியோகித்தை நிறுத்திவைப்பதைத் தவிா்க்க வேண்டும் என்பன உள்ளிட்ட தீா்மானங்கள் நிறைவேற்றப்பட்டன.