ஜிப்மரில் புதுச்சேரி மக்களுக்கென தனி புறநோயாளிகள் சிகிச்சை பிரிவு: மத்திய அமைச்சா் நட்டாவிடம் கோரிக்கை

புதுச்சேரி: ஜிப்மரில் புதுச்சேரி மக்களின் புறநோயாளிகள் சிகிச்சைக்கான தனி பிரிவை செயல்படுத்த வேண்டும் என மத்திய சுகாதாரத் துறை அமைச்சா் ஜெ.பி.நட்டாவிடம் புதுவைப் பேரவைத் தலைவா் ஆா்.செல்வம் வலியுறுத்தி மனு அளித்துள்ளாா்.

இதுகுறித்து புதுவை பேரவைத் தலைவா் ஆா்.செல்வம் அலுவலகம் செவ்வாய்க்கிழமை வெளியிட்ட செய்திக்குறிப்பு: புதுவை சட்டப்பேரவைத் தலைவா் ஆா்.செல்வம் செவ்வாய்க்கிழமை (அக். 22) தில்லி சென்று மத்திய சுகாதாரத் துறை அமைச்சா் ஜெ.பி.நட்டாவைச் சந்தித்து மனு அளித்தாா். அதில், புதுச்சேரி ஜிப்மரில் ஏற்கெனவே புதுச்சேரி மக்களுக்கென புறநோயாளிகள் சிகிச்சை பிரிவு செயல்பட்டுவந்தது. ஆனால், தற்போது அந்தப் பிரிவு செயல்படுத்தப்படவில்லை. புறநோயாளிகள் பொதுப் பிரிவில் தான் தமிழகம் உள்ளிட்ட பிற மாநிலத்தவருடன் இணைந்து புதுச்சேரி மக்களும் சிகிச்சைக்குப் பதிவு செய்கின்றனா். இதனால், புதுச்சேரி மக்கள் சிரமத்துக்குள்ளாகின்றனா்.

எனவே, புதுச்சேரி மக்களுக்கென புறநோயாளிள் தனிப்பிரிவை ஏற்படுத்தவேண்டும் என குறிப்பிட்டுள்ளாா்.

அப்போது, அரியாங்குப்பம் பாஸ்கா் (எ) தட்சிணாமூா்த்தி எம்எல்ஏ உள்ளிட்டோா் உடனிருந்தனா்.