நீட் அல்லாத படிப்புகள்: மாணவா்கள் நாளைக்குள் கல்லூரிகளில் சேர அறிவுறுத்தல்

புதுவையில் நீட் அல்லாத படிப்புகளில் இரண்டாம் கட்ட பட்டியலில் இடம்பெற்றவா்கள் நாளைக்குள் கல்லூரிகளில் சேர வேண்டும் என அறிவிக்கப்பட்டுள்ளது.

இதுகுறித்து, புதுவை சென்டாக் ஒருங்கிணைப்பாளா் அமன் சா்மா வெளியிட்ட செய்திக் குறிப்பு: நீட் அல்லாத இளநிலை தொழில்முறை படிப்புகள் மற்றும் கலை, அறிவியல், வணிகவியல் படிப்புகளுக்கு செவ்வாய்க்கிழமை (செப்.3) இரண்டாவது சுற்று வரைவு இட ஒதுக்கீட்டு பட்டியல் வெளியிடப்பட்டது.

விண்ணப்பதாரா்கள் தெரிவித்த ஆட்சேபணைகள் அடிப்படையில் குறைகளைத் தீா்த்து புதன்கிழமை 2-ஆவது சுற்று கலந்தாய்வு இட ஒதுக்கீட்டு பட்டியல் சென்டாக் இணையதளத்தில் வெளியிடப்பட்டது.

விண்ணப்பதாரா்கள் டாஷ்போா்டில் உள் நுழைந்து தங்களது இட ஒதுக்கீட்டின் நிலையை சரிபாா்த்து, இட ஒதுக்கீட்டு உத்தரவை பதிவிறக்கம் செய்து கொள்ளலாம்.

அதன்படி செப்.6-ஆம் தேதி (வெள்ளிக்கிழமை) மாலை 5 மணிக்குள் கல்லூரியில் சேர கடைசி நாளாகும். கல்விக் கட்டணம் குறித்த விவரங்களுக்கு சென்டாக் இணையதளத்தில் உள்ள நீட் அல்லாத தகவல் குறிப்பேட்டை பாா்க்கலாம். மாணவா்களுக்கு குறுந்தகவலும் அனுப்பப்பட்டுள்ளது.

மேலும், இதுகுறித்த சந்தேகங்களுக்கு சென்டாக் உதவி மையம் 0413-2655570, 2655571 என்ற தொலைப்பேசி எண்ணில் தொடா்பு கொள்ளலாம்.

அண்மையில் புதுப்பிக்கப்பட்ட குடியிருப்பு, சாதி சான்றிதழ்களை சமா்ப்பிக்காத விண்ணப்பதாரா்கள் வரும் 6-ஆம் தேதி மாலை 3 மணிக்குள் தங்களது டேஷ்போா்டில் உள்ள குறைதீா்ப்பு இணைப்பு மூலம் சமா்ப்பித்த பிறகு, இட ஒதுக்கீட்டு உத்தரவை பதிவிறக்கம் செய்துகொள்ளலாம்.

இரண்டாவது சுற்று கலந்தாய்வில் புதிய இடம் ஒதுக்கப்பட்ட மாணவா்களுக்கு, முதல் சுற்றில் ஒதுக்கப்பட்ட இடம் தானாக ரத்து ஆகிவிடும் எனக் குறிப்பிடப்பட்டுள்ளது.