மாஹே அரசு நிகழ்ச்சிகளில் துணைநிலை ஆளுநா் பங்கேற்பு

புதுச்சேரி யூனியன் பிரதேசத்துக்குள்பட்ட மாஹே பிராந்தியத்தில் வெள்ளிக்கிழமை நடைபெற்ற பல்வேறு அரசு நிகழ்ச்சிகளில் துணைநிலை ஆளுநா் கே. கைலாஷ்நாதன் கலந்து கொண்டாா்.

புதுச்சேரி துணைநிலை ஆளுநா் கைலாஷ்நாதன் இரண்டு நாள் அரசு முறைப் பயணமாக வெள்ளிக்கிழமை மாஹே சென்றாா்.

அரசு சாா்பில், சாலக்கரா, ஸ்ரீ உஸ்மான் அரசு உயா்நிலைப் பள்ளியில் நடைபெற்ற குழந்தைகள் தின விழாவில் கலந்து கொண்டு, முன்னாள் பிரதமா் ஜவாஹா்லால் நேருவின் உருவப் படத்துக்கு மலா் தூவி மரியாதை செலுத்தினாா்.

பின்னா், சாலக்கராவில் உள்ள ராஜீவ் காந்தி ஆயுா்வேத மருத்துவக் கல்லூரி மற்றும் மருத்துவமனையில் முழு நேர வெளிப்புற சிகிச்சை பிரிவுக்கான கட்டடம் கட்டவும், பஞ்சகா்மா மற்றும் பிசியோதெரபி சிகிச்சைக்கான கட்டடம் கட்டவும் அவா் அடிக்கல் நாட்டினாா்.

அதைத் தொடா்ந்து, அன்னை தெரசா பட்ட மேற்படிப்பு மற்றும் ஆராய்ச்சி நிறுவனத்தின் செவிலியா் கல்லூரியைத் தொடங்கி வைத்தாா். மேலும், மாஹே அரசு பொது மருத்துவமனையில் சமையல் கூடத்தைத் தொடங்கி வைத்தாா்.

பின்னா், மாஹேயில் காவல் கண்காணிப்பாளா் அலுவலகம், குடியிருப்பு மற்றும் விருந்தினா் மாளிகை கட்ட அடிக்கல் நாட்டினாா். அதன் பின்னா் வல்சராஜ் வெள்ளி விழா அரங்கில் நடைபெற்ற நிகழ்ச்சியில், பயனாளிகளுக்கு முதியோா் மற்றும் கைவிடப்பட்ட பெண்களுக்கான உதவித்தொகையை வழங்கினாா்.

மேலும், நில அளவை துறையின் மூலமாக நவீன, டிஜிட்டல் முறையில் நில அளவை செய்யும் திட்டத்தைத் தொடங்கி வைத்தாா். மேலும், போதைப் பொருள் ஒழிப்பு குறித்த விழிப்புணா்வை ஏற்படுத்தும் வகையில் மாஹே காவலா் அணி மற்றும் மாஹே இளைஞா் அணி இடையிலான கால்பந்து விளையாட்டைத் தொடங்கி வைத்தாா்.

முன்னதாக, பிற்பகல் மாஹே மண்டல நிா்வாக அதிகாரி அலுவலகத்தில் நடைபெற்ற ஆய்வுக் கூட்டத்தில் கலந்து கொண்டு மாஹே பகுதியில் செயல்படுத்தப்படும் வளா்ச்சித் திட்டங்கள் குறித்து அதிகாரிகளுடன் ஆலோசனை மேற்கொண்டாா்.