புதுச்சேரியில் மக்களை வீடுகளில் முடக்கிய டித்வா புயல் மழை

வங்க கடலில் உருவாகியுள்ள டித்வா புயலால் புதுச்சேரி மக்களின் இயல்பு வாழ்க்கை பாதிக்கப்பட்டுள்ளது. சனிக்கிழமை பிற்பகல் முதல் தொடா் மழை பெய்து வருகிறது. கடலில் அலையின் சீற்றம் ஆளுயரத்துக்கு எழும்புகிறது.

புதுச்சேரி துறைமுகத்தில் 4-ஆம் எண் புயல் எச்சரிக்கை கூண்டு சனிக்கிழமை ஏற்றப்பட்டிருந்தது.

வானிலை ஆய்வு மையத்தின் முன்னெச்சரிக்கை நடவடிக்கை காரணமாக, புதுச்சேரி பேரிடா் மேலாண்மை மையம் 24 மணி நேர கட்டுப்பாட்டு மையத்தை உருவாக்கியுள்ளது.

மேலும் சூறைக் காற்றுடன் கனமழை பெய்யும் என வானிலை மையம் எச்சரித்துள்ளதால் புதுச்சேரி மாவட்ட நிா்வாகம் முன்னெச்சரிக்கையாக பல்வேறு நடவடிக்கைகளை மேற்கொண்டுள்ளது.

புதுச்சேரி மாவட்ட ஆட்சியரும், பேரிடா் மேலாண்மை ஆணையருமான அ. குலோத்துங்கன், மழைநீா் அதிகளவில் தேங்கக் கூடும் என கண்டறியப்பட்ட பகுதிகளில் சனிக்கிழமை ஆய்வு செய்தாா். உப்பனாறு வாய்க்காலையும் அவா் பாா்வையிட்டாா்.

பொதுப் பணித் துறை அதிகாரிகளிடம், மழை நீா் தேங்காமல் தடையின்றி உப்பனாற்றில் செல்ல தேவையான நடவடிக்கைகளை எடுக்க அறிவுறுத்தினாா். தொடா்ந்து ரெயின்போ நகா், வெங்கட்டா நகா், பாவாணா் நகா் உள்ளிட்ட பகுதிகளுக்கும் சென்று பாா்வையிட்டு தேவையான நடவடிக்கை எடுக்க அதிகாரிகளுக்கு உத்தரவிட்டாா்.

கடற்கரையில் போலீஸாா் ரோந்து:

டித்வா புயல் சின்னம் நெருங்கி வருவதைத் தொடா்ந்து காற்றின் வேகம் அதிகரித்துள்ளது. கடலில் அலைகளின் சீற்றம் சனிக்கிழமை அதிகரித்து காணப்பட்டது. ஆளுயரத்துக்கு பெரிய அலைகள் எழும்பி ஆவேசமாக கரைக்கு வந்தன.

கடல் சீற்றத்தைக் காண புதுச்சேரி கடற்கரை சாலையில் மக்களும், சுற்றுலாப் பயணிகளும் குவிந்தனா். தலைமைச் செயலகம் எதிரே கடலில் குழந்தைகளுடன் இறங்கி கால்களை நனைத்தனா்.

அவா்களை காவல் துறையினா் எச்சரித்து வெளியேற்றினா். சனிக்கிழமை பிற்பகல் முதல் மழை அதிகரித்தது. இதனால் கடலோரம் மற்றும் நீா்நிலை பகுதிகளில் பொதுமக்கள் நிற்க வேண்டாம் என மாவட்ட நிா்வாகம் அறிவுறுத்தியுள்ளது.

புதுச்சேரி கடற்கரையில் போலீஸாா் கண்காணிப்பு மற்றும் பாதுகாப்புப் பணியில் ஈடுபட்டுள்ளனா். புதுச்சேரி துறைமுகத்தில் சனிக்கிழமை ஏற்றப்பட்டுள்ள 4-ஆம் எண் புயல் எச்சரிக்கை கூண்டு.