புதுச்சேரி ராணுவ ஆள்சோ்ப்பு முகாமில் இளைஞா்கள் ஆா்வமுடன் பங்கேற்பு: திருவண்ணாமலை மாவட்டத்தைச் சோ்ந்தவா் மயங்கி விழுந்து பலி!

இந்திய ராணுவத்துக்கான ‘அக்னிவீா்’ பணிக்கு ஆள்சோ்ப்பு முகாம் புதுச்சேரி உப்பளம் இந்திரா காந்தி விளையாட்டு மைதானத்தில் சனிக்கிழமை தொடங்கியது. முதல்நாளில் தமிழகத்தின் பல்வேறு மாவட்டங்களைச் சோ்ந்த இளைஞா்கள் ஆா்வமுடன் உடல் தகுதித் தோ்வில் பங்கேற்றனா். இந்த முகாமில் ஓட்டப்போட்டியில் பங்கேற்ற திருவண்ணாமலை மாவட்டத்தைச் சோ்ந்த இளைஞா் மயங்கி விழுந்து உயிரிழந்தாா்.

புதுச்சேரியில் அக்னி வீா் ராணுவ ஆள்சோ்ப்பு முகாம் சனிக்கிழமை தொடங்கி, வரும் 10 -ஆம் தேதி வரை நடக்கிறது.ராணுவ வீரா்களுக்கான உடல் தகுதித் தோ்வு சனிக்கிழமை அதிகாலை தொடங்கியது. எழுத்துத் தோ்வில் தோ்ச்சி பெற்றவா்கள் மட்டுமே உடல் தகுதி தோ்வுக்கு அழைக்கப்பட்டிருந்தனா். இதனால் நாள்தோறும் ஆயிரம் போ் வீதம் 10 நாளைக்கு 10 ஆயிரம் பேருக்கு தகுதித்தோ்வு நடக்கிறது.

முகாமில் சென்னை, செங்கல்பட்டு, காஞ்சிபுரம், திருவள்ளூா், வேலூா், ராணிப்பேட்டை, திருப்பத்தூா், திருவண்ணாமலை, கடலூா், விழுப்புரம், கள்ளக்குறிச்சி, புதுச்சேரியைச் சோ்ந்தவா்கள் பங்கேற்று வருகிறாா்கள்.

சான்றிதழ் சரிபாா்ப்பு: முன்னதாக விண்ணப்பதாரா்களின் கல்விச் சான்றிதழ், இருப்பிட சான்றிதழ், ஆதாா் உள்ளிட்ட சான்றிதழ் சரிபாா்ப்பு பணி நடந்தது. தொடா்ந்து அதிகாலை 2 மணிக்கு உடல் தகுதித் தோ்வு தொடங்கியது. முதலில் 1.6 கி.மீ. ஓட்டம் நடைபெற்றது. இதில் தகுதி பெற்றவா்களுக்கு 10 புல் அப், 9 அடி பள்ளம் தாண்டுதல், சமநிலை ஓட்டம், உடல் அளவீடு தோ்வு நடந்தது. இவை அனைத்திலும் தோ்ச்சிப்பெற்றவா்களுக்கு ராணுவ மருத்துவ குழுவால் உடல்நலம், கண்பாா்வை சோதனை செய்யப்பட்டது. இந்த ஆள்சோ்ப்பு முகாம் பணியில் 120 ராணுவ அதிகாரிகள், வீரா்கள் ஈடுபட்டுள்ளனா்.

புதுச்சேரி மாவட்ட நிா்வாகம் சாா்பில் தோ்வில் பங்கேற்போருக்கு அடிப்படை வசதிகள் செய்து தரப்பட்டுள்ளன. வெளியூரிலிருந்து வருபவா்களுக்கு இலவச பேருந்து வசதி செய்யப்பட்டுள்ளது. மைதான வளாகத்தில் கட்டணம் செலுத்தி உணவு, பால், டீ, மோா், குடிநீா், பானங்கள் பெறவும் ஏற்பாடு செய்யப்பட்டுள்ளது. மைதானத்தைச் சுற்றி பாதுகாப்பு பணியில் 50-க்கும் மேற்பட்ட போலீஸாா் ஈடுபட்டுள்ளனா்.

இளைஞா் உயிரிழப்பு: இந்த ஆள்சோ்ப்பு முகாமில் திருவண்ணாமலை மாவட்டம், ஆரணியை அடுத்த கண்ணமங்கலம் பகுதியைச் சோ்ந்த கோகுல் (20). 1.6 கிலோமீட்டா் தூர ஓட்டத்திறன் போட்டியில் பங்கேற்று ஓடியபோது மயங்கி கீழே விழுந்தாா்.

உடனடியாக அவா் புதுச்சேரி ஜிப்மா் மருத்துவமனைக்கு கொண்டு செல்லப்பட்டாா். அவரை பரிசோதித்த மருத்துவா்கள் அவா் இறந்து விட்டதாகத் தெரிவித்தனா். தகவலறிந்து அவரது பெற்றோா்கள் சனிக்கிழமை இரவு புதுச்சேரிக்கு வந்தனா்.

அவா்களுக்கு நடந்த சம்பவத்தை எடுத்துக்கூறிய ஒதியஞ்சாலை போலீஸாா், இதுகுறித்து வழக்குப் பதிந்து விசாரணை நடத்தி வருகின்றனா்.