புதுச்சேரியில் கனமழை: 2,000 ஏக்கரில் நெல்பயிா்கள் நீரில் மூழ்கின! குடியிருப்புப் பகுதிகளில் வெள்ளம் சூழ்ந்தது!

புதுச்சேரி மாவட்டத்தின் பல்வேறு பகுதிகளில் பலத்த மழையால் ஆறுகளில் வெள்ளப்பெருக்கு ஏற்பட்டுள்ளது. சுமாா் 2,000 ஏக்கரில் சாகுபடி செய்யப்பட்டிருந்த நெல் உள்ளிட்ட பயிா்கள் நீரில் மூழ்கியதால் விவசாயிகள் கவலை அடைந்துள்ளனா்.

குடியிருப்புப் பகுதிகளில் மழை வெள்ளம் சூழ்ந்து மக்களின் இயல்பு வாழ்க்கை பாதிக்கப்பட்டுள்ளது.

புதுச்சேரியில் ஞாயிற்றுக்கிழமை விட்டு விட்டு பலத்த மழை பெய்தது. சனிக்கிழமை மாலை 5.30 மணி முதல் ஞாயிற்றுக்கிழமை காலை 8.30 மணி வரை 9.7 செ.மீ. மழை பதிவாகியது.

நிறம் மாறிய கடல்நீா்:

தொடா் பலத்த மழையின் காரணமாக புதுச்சேரி பகுதியில் கடல்நீா் வழக்கமான நீல நிறத்தில் இருந்து செம்மண், பழுப்பு நிறத்திற்கு மாறியது. கடல் நீா் செம்மண் நிறத்தில் இருக்கும் வரை மீனவா்கள் மற்றும் பொதுமக்கள் யாரும் கடலில் இறங்க வேண்டாம் என மாசுக் கட்டுப்பாட்டு வாரியம் அறிவுறுத்தியுள்ளது.

மீனவா்கள் கடலுக்குள் செல்ல வேண்டாம் என மீன்வளத் துறை எச்சரிக்கை விடுத்துள்ளது. பெரிய வாய்க்கால், உப்பனாறு வாய்க்கால், வெள்ளவாரி வாய்க்கால் உள்ளிட்ட பிரதான வாய்க்கால்களில் வெள்ளநீா் பெருக்கெடுத்து ஓடியது. புதுச்சேரி வெங்கடா நகா், ரெயின்போ நகா், கிருஷ்ணா நகா், எழில் நகா், பாவாணன் நகா் உள்ளிட்ட தாழ்வான குடியிருப்பு பகுதிகளில் வெள்ள நீா் சூழ்ந்தது.

மழை காரணமாக, புதுச்சேரி சாலைகளில் மக்கள் நடமாட்டம் குறைந்து காணப்பட்டது. இந்திரா காந்தி சிக்னல், ராஜீவ் காந்தி சிக்னல், சிவாஜி சிலை சிக்னல் உள்ளிட்ட முக்கிய சிக்னல்களிலும், 45 அடி சாலை, முருங்கப்பாக்கம் கடலூா்- புதுச்சேரி சாலை போன்றவற்றில் மழைநீா் ஆறாகப் பெருக்கெடுத்து ஓடியது. இதனால் வாகன ஓட்டிகள் கடும் இன்னலுக்கு ஆளாகினா்.

புதுச்சேரிக்கு வந்த சுற்றுலா பயணிகள் வெளியே செல்ல முடியாமல் விடுதிகள் மற்றும் உணவகங்களில் முடங்கினா். மேலும், பிற்பகலில் ஓரளவு மழைநீா் வடிந்து சாலைகளில் வாகன போக்குவரத்து இயல்பு நிலைக்குத் திரும்பியது.

2,000 ஏக்கரில் நெல்பயிா்கள் பாதிப்பு:

திருக்கனூா், மண்ணாடிப்பட்டு, வம்புபட்டு, செல்லிப்பட்டு, விநாயகம்பட்டு உள்ளிட்ட கிராமப் பகுதிகளில் பலத்த மழையால் விளை நிலங்களில் பயிரிடப்பட்ட சுமாா் 2,000 ஏக்கரில் நெல்பயிா்கள் மழை நீரில் மூழ்கி சேதமடைந்துள்ளன. இதனால் விவசாயிகளும் கவலை அடைந்துள்ளனா்.

இது குறித்து விவசாயிகள் கூறும்போது, மழையாலும், வறட்சியாலும் பாதிக்கப்படுவது விவசாயிகள்தான் என்றனா்.

துணைநிலை ஆளுநா் ஆய்வு:

நோணாங்குப்பம் சுண்ணாம்பாறு நீரோட்டத்தை துணைநிலை ஆளுநா் கே.கைலாஷ்நாதன் பாா்வையிட்டாா். மேலும், நீா்வடியும் பாதையில் ஏற்பட்டிருந்த அடைப்பை அங்கிருந்த ஒருவரைக் கொண்டு சரி செய்து சுண்ணாம்பாறு மேம்பாலத்தில் தேங்கியிருந்த மழைநீரை வடிய ஏற்பாடு செய்தாா்.

புதுச்சேரி இந்திரா காந்தி சிலை, சிவாஜி சிலை சந்திப்பு, கிருஷ்ணா நகா், எழில் நகா் உள்ளிட்ட பகுதிகள் வெள்ளக்காடாக காட்சியளித்தன. இப் பகுதிகளில் பொதுப்பணித் துறை அமைச்சா் மல்லாடி கிருஷ்ணா ராவ், மாவட்ட ஆட்சியா் அ. குலோத்துங்கன் ஆகியோா் அதிகாரிகளுடன் ஆய்வு மேற்கொண்டனா்.

மேலும், தாழ்வான பகுதிகளில் வசிக்கும் மக்களைப் பாதுகாப்பான இடங்களுக்கு மாற்றவும், நிவாரண மையங்களை தயாா் நிலையில் வைக்கவும் ஆட்சியருக்கு அமைச்சா் மல்லாடி கிருஷ்ணா ராவ் அறிவுறுத்தினாா்.

படகு குழாமில் மூடல்:

சுண்ணாம்பாற்றில் தண்ணீா் பெருக்கெடுத்து ஓடுகிறது. இதனால் நோணாங்குப்பம் படகு குழாமில் நடைமேடை வரை தண்ணீா் ஓடியதால் படகு சவாரி நிறுத்தப்பட்டது.

படகுகளும் பாதுகாப்பாக கரைகளில் ஏற்றி நிறுத்தி வைக்கப்பட்டன. இதனால் படகு இல்லம் வந்த சுற்றுலாப் பயணிகள் ஏமாற்றத்துடன் திரும்பினா். ஆற்றில் தண்ணீா் குறைந்து இயல்பு நிலை திரும்பியதும் படகு சவாரி தொடங்கப்படும் என்று அதிகாரிகள் தரப்பில் தெரிவித்தனா்.