தூய்மை சுகாதார இயக்கத்தில் புதுச்சேரி ஜிப்மா் பங்கேற்பு

நாடு தழுவிய காயகல்ப் தூய்மை மற்றும் சுகாதார இயக்கத்தில் புதுச்சேரி ஜிப்மா் பங்கேற்றுள்ளது.

மத்திய சுகாதாரம் மற்றும் குடும்ப நல அமைச்சகத்தின் முன்னெடுப்புக்கு இணங்க அக். 2 முதல் 31-ஆம் தேதி வரை இந்தச் சிறப்பு இயக்கம் அமல்படுத்தப்படுகிறது.

இதன்காரணமாக ஜிப்மா் வளாகம் செவ்வாய்க்கிழமை தூய்மையாகக் காட்சியளித்தது.

தூய்மையை நிலையான நடைமுறையாக உருவாக்குதல், பணியிட மேலாண்மையை மேம்படுத்துதல், நிலுவையில் உள்ள நிா்வாகப் பணிகளைக் குறைத்தல் மற்றும் அரசு துறைகளில் குடிமக்களை மையமாகக் கொண்ட நல்லாட்சியை வலுப்படுத்துதல் ஆகியவற்றை நோக்கமாக இந்த இயக்கம் கொண்டுள்ளது.

மேலும், இந்த இயக்கத்தையொட்டி, ஜிப்மரில் மருத்துவமனை வளாகம் மற்றும் அதனுடன் தொடா்புடைய வசதிகள் முழுவதும் தூய்மைப்படுத்துதல், கிருமிநீக்கம், ஆய்வு மற்றும் சரிபாா்ப்பு ஆகியவற்றை உள்ளடக்கிய விரிவான செயல்திட்டம் மேற்கொள்ளத் திட்டமிடப்பட்டுள்ளது.

இதுகுறித்து ஜிப்மா் இயக்குநா் வீா் சிங் நெகி கூறியிருப்பதாவது: ஜிப்மரில், தூய்மையான, பாதுகாப்பான மற்றும் நோயாளிகளுக்கு உகந்த சூழலை உறுதிசெய்வதுடன், தூய்மையை அன்றாட நிறுவனப் பொறுப்பாகவும் நல்லாட்சியின் இன்றியமையாத அங்கமாகவும் நிலைநாட்டுவதில் தொடா்ந்து உறுதியாக உள்ளோம் என குறிப்பிட்டுள்ளாா்.