காச நோய் கண்டறியும் முகாம்

திருவெண்ணெய்நல்லூர் அருகே காச நோய் கண்டறியும் முகாம் மற்றும் விழிப்புணர்வு கலை நிகழ்ச்சி புதன்கிழமை நடைபெற்றது.
 விழுப்புரம் மாவட்ட காசநோய் தடுப்பு மையம் சார்பில், கிராமங்களில் காச நோய் கண்டறியும் முகாம்கள் நடத்தப்பட்டு வருகின்றன.
 அந்த வகையில், திருவெண்ணெய்நல்லூர் அருகே உள்ள காந்திக்குப்பம் கிராமத்தில் காசநோய் தடுப்பு விழிப்புணர்வு கலைநிகழ்ச்சியும், காச நோய் கண்டறியும் முகாமும் நடைபெற்றது.
 மாவட்ட காசநோய் பிரிவு துணை இயக்குநர் சுதாகர் தலைமை வகித்தார். காச நோய் மைய மருத்துவ அலுவலர் நேதாஜி சுபாஷ்
 சந்திரபோஸ், ஒருங்கிணைப்பாளர் சசிக்குமார், நலக் கல்வியாளர் மெகபூப்பாஷா, முதுநிலை சிகிச்சை பிரிவு மேற்பார்வையாளர் செந்தில்குமார், சுகாதார ஆய்வாளர் சத்தியமூர்த்தி ஆகியோர் முன்னிலை வகித்தனர்.
 இந்தியாவில் காச நோயின் பாதிப்புகள், அதனால் ஏற்படும் உயிரிழப்புகள், காச நோய் இல்லாத இந்தியாவை உருவாக்கவும், தமிழகத்தில் காச நோய் பாதிப்பை முற்றிலும் அகற்றவும் மத்திய, மாநில அரசுகளின் தடுப்பு நடவடிக்கைகள், விழுப்புரம் மாவட்டத்தில் காச நோய் தடுப்புப் பணிகள் குறித்து பேசினர்.
 இதைத் தொடர்ந்து, சித்தானங்கூர் நிலா கலைக் குழுவினரின் காச நோயின் பாதிப்புகள் குறித்து விழிப்புணர்வு கலை நிகழ்ச்சி நடைபெற்றது. காச நோய் பிரிவு பணியாளர்கள் சுரேஷ், ராமச்சந்திரன், சக்திவேல், ஜெகன்நாதன், முருகன், திருவெண்ணெய்நல்லூர் தனியார் செவிலியர் கல்லூரி மாணவ, மாணவிகள், பொது மக்கள் என பலர் கலந்துகொண்டனர்.