புதுச்சேரியிலிருந்து சென்னைக்கு கடத்த முயன்ற 720 மதுப் புட்டிகள் பறிமுதல்: ஒருவர் கைது

புதுச்சேரியிலிருந்து சென்னைக்கு காரில் ஞாயிற்றுக்கிழமை கடத்த முயன்ற 720 மதுப் புட்டிகளை கோட்டக்குப்பம் பகுதியில் போலீஸார் பறிமுதல் செய்தனர். இது தொடர்பாக ஒருவர் கைது செய்யப்பட்டார்.
விழுப்புரம் மாவட்டம், கோட்டக்குப்பத்தில் உள்ள மது விலக்கு சோதனைச்சாவடியில் தலைமைக் காவலர் பாஸ்கர் தலைமையிலான போலீஸார் ஞாயிற்றுக்கிழமை வாகன தணிக்கையில் ஈடுபட்டனர்.
அப்போது, அந்த வழியாக புதுச்சேரியிலிருந்து சென்னை நோக்கிச் சென்ற காரை சந்தேகத்தின்பேரில் நிறுத்தி சோதனையிட்டனர். அதில், 15 அட்டைப் பெட்டிகளில் மொத்தம் 720 புதுச்சேரி மதுப் புட்டிகள் இருந்தது தெரியவந்தது. இதன் மதிப்பு சுமார் ரூ. ஒரு லட்சம் இருக்கும்.
இது தொடர்பாக காரில் இருந்தவரை பிடித்து போலீஸார் விசாரித்தனர். விசாரணையில், அவர் புதுச்சேரி லாஸ்பேட்டையைச் சேர்ந்த ஜெயவேல் மகன் சடையப்பன் (42) என்பதும், புதுச்சேரியில் குறைந்த விலைக்கு மதுப் புட்டிகளை வாங்கி சென்னைக்கு கடத்திச் சென்று விற்பனை செய்ய முயன்றதும் தெரியவந்தது. இதையடுத்து, மதுப் புட்டிகள், கடத்தலுக்குப் பயன்படுத்தப்பட்ட காரை போலீஸார் பறிமுதல் செய்து கோட்டக்குப்பம் மது விலக்கு காவல் நிலையத்தில் ஒப்படைத்தனர். இதுகுறித்து மது விலக்கு போலீஸார் வழக்குப் பதிவு செய்து விசாரணை நடத்தி வருகின்றனர்.