ஆர்.டி.ஓ. அலுவலகத்தில் இணையவழியில் பணம் செலுத்தி 1,298 பேர் விண்ணப்பம்

விழுப்புரம் ஆர்.டி.ஓ. அலுவலகத்தில் ரொக்கமில்லா பணப் பரிவர்த்தனை முறையில் 5 நாள்களில் 1,298 பேர் விண்ணப்பித்துள்ளனர்.
இது குறித்து விழுப்புரம் வட்டாரப் போக்குவரத்து அலுவலர் பாலகுருநாதன் வெளியிட்ட செய்திக் குறிப்பு: 
ஓட்டுநர் உரிமம், வாகனப் பதிவு போன்றவை கோரி வட்டாரப் போக்குவரத்து அலுவலகங்களில் இணைய வழியாக விண்ணப்பிக்கும் முறை முதலில் அறிமுகப்படுத்தப்பட்டது. 
ஆனால், இணைய வழியாக விண்ணப்பித்தாலும், அதற்கான கட்டணங்களை நேரில் சென்று அலுவலகத்தில் செலுத்த வேண்டும். 
அதன் பிறகு, கடந்த 2017-ஆம் ஆண்டு முதல் புதிய வாகன பதிவுக் கட்டணம், சாலை வரி போன்ற கட்டணங்கள் இணைய வழியாக செலுத்தும் முறைக்கு மாற்றப்பட்டது. இதையடுத்து, அக்டோபர் 1-ஆம் தேதி முதல் ஓட்டுநர் உரிமம், பழகுநர் உரிமம், வாகன பெயர் மாற்றம், தவணை ரத்து கட்டணம் உள்ளிட்ட அனைத்துக் கட்டணங்களும் ரொக்கமில்லா பணப் பரிவர்த்தனைக்கு மாற்றப்பட்டது. 
இதன்படி, இனிமேல், வட்டாரப் போக்குவரத்து அலுவலகத்தில் செலுத்த வேண்டிய அனைத்து கட்டணங்களும் இணைய வழியில் மட்டுமே செலுத்த வேண்டும். 
இதற்காக, உருவாக்கப்பட்டுள்ள https://parivahan.gov.in என்ற மத்திய அரசின் இணையதளத்தில் மட்டும் கட்டணங்களை செலுத்த முடியும். 
இதன் மூலமாக, விழுப்புரம் வட்டாரப் போக்குவரத்து அலுவலகத்தில் ரொக்கமில்லா பணப் பரிவர்த்தனை முறை முழுமையாக செயல்படுத்தப்பட்டு வருகிறது. 
இந்த புதிய முறையில், வீட்டில் இருந்தபடியே, 24 மணி நேரமும் கட்டணங்களை செலுத்த முடியும். 
இந்த புதிய முறை அறிமுகப்படுத்தப்பட்ட கடந்த அக்டோபர் 1 முதல் 5-ஆம் தேதி வரை 1,298 பேர் ஓட்டுநர் உரிமம், வாகன பெயர் மாற்றம் உள்ளிட்டவை கோரி விண்ணப்பித்துள்ளனர். இதற்காக, ரூ.1 லட்சத்து 97 ஆயிரத்து 485 வரை கட்டணமாக இணைய வழியாக செலுத்தப்பட்டுள்ளது என்று பாலகுருநாதன் தெரிவித்தார்.