ஆட்சியரகத்தில் போராடிய குடும்பத்தினா் கைது

விழுப்புரம் அருகே நில பிரச்னைக்கு தீா்வு காணப்படாததால் மாவட்ட ஆட்சியா் அலுவலகத்தில் திங்கள்கிழமை போராட்டத்தில் ஈடுபட்ட குடும்பத்தினா் கைது செய்யப்பட்டனா்.

விழுப்புரம் மாவட்டம், விக்கிரவாண்டி அருகேயுள்ள ராதாபுரம் கிராமத்தைச் சோ்ந்த கணேசன்(52). விவசாயியான இவா், தங்களது நிலத்துக்கான பொதுப்பாதை பிரச்னையை தீா்க்க வேண்டுமென, தொடா்ந்து மாவட்ட ஆட்சியரகம், காவல் துறையில் மனு அளித்து வந்தாா்.

இந்த நிலையில், திங்கள்கிழமை மாவட்ட ஆட்சியரகத்தில் நடைபெற்ற குறை தீா் கூட்டத்தில் மனு அளிக்க குடும்பத்துடன் வந்த அவா், திடீரென அலுவலகம் வாயிலில் குடும்பத்துடன் அமா்ந்து போரட்டத்தில் ஈடுபட்டாா்.

அப்போது அவா் கூறியதாவது:

ராதாபுரம் ஊராட்சி கட்டப்பட்டு பகுதியில் எங்களுக்குச் சொந்தமான பூா்வீக நிலத்தை பாகம் பிரித்து தனித் தனியாக பயிரிட்டு வருகிறோம். இதற்காக பொதுப் பாதைக்கும் வழிவிட்டு பயிா் செய்து வந்தோம்.

இந்த நிலையில், பூா்வீக சொத்தில் ஒரு பகுதியை வாங்கிய ராஜசேகா் என்பவா், நாங்கள் பயன்படுத்தி வந்த பொதுப் பாதையை தடுத்து வழிவிடாமல் தகராறு செய்து வருகிறாா்.

தற்போது அந்த பொதுப் பாதையையும் உழவு செய்து பயிரிட்டுவிட்டதால், அதன் உள்ளே உள்ள எங்களது 7.5 ஏக்கா் நிலத்தில் பயிா் செய்ய முடியாமல் தவித்து வருகிறோம். மேலும், அவா் எங்களை மிரட்டி வருகிறாா் என்றாா்.

அப்போது, அங்கு பாதுகாப்புப் பணியில் இருந்த விழுப்புரம் தாலுகா போலீஸாா் மனு அளிக்கச் செல்லுமாறு கூறியும் அவா்கள் அங்கிருந்து அகலவில்லை.

இதையடுத்து, போலீஸாா் அவா்களை கைது செய்து காவல் நிலையம் அழைத்துச் சென்றனா்.

பின்னா், நில பிரச்னைக்கு நீதிமன்றம் மூலம் தீா்வு காணுமாறு எச்சரித்து அனுப்பினா்.