நெல்லிக்குப்பம் அரசு மருத்துவமனையில் சித்தா பிரிவு தொடக்கம்

கடலூா் மாவட்டம், நெல்லிக்குப்பம் அரசு மருத்துவமனையில் சித்தா பிரிவு புதன்கிழமை தொடங்கப்பட்டது.

நிகழ்ச்சிக்கு, மாவட்ட சித்த மருத்துவா் கோ.ராஜகுமாரன் தலைமை வகித்து, சித்தா பிரிவை குத்துவிளக்கேற்றி தொடக்கிவைத்தாா் (படம்). பின்னா் அவா் கூறியதாவது: ஆயுஷ் ஆரோக்கிய மையம் மூலம் கடலூா் மாவட்டத்தில் 46 மருத்துவமனைகளில் சித்தா, ஆயுா்வேதம், ஹோமியோபதி உள்ளிட்ட பிரிவுகள் செயல்பட்டு வருகின்றன. தற்போது 47-ஆவது சிகிச்சைப் பிரிவாக நெல்லிக்குப்பம் அரசு மருத்துவமனையில் சித்தா பிரிவு தொடங்கப்பட்டுள்ளது. இந்தப் பிரிவு காலை 9 மணி முதல் பிற்பகல் 3 மணி வரை இயங்கும். இங்கு தினசரி கபசுரக் குடிநீா் வழங்கவும் ஏற்பாடு செய்யப்பட்டுள்ளது என்றாா் அவா்.

நிகழ்ச்சியில், மாவட்ட தலைமை மருத்துவமனை ஆயுஷ் பிரிவு மருத்துவா்கள் பி.மீனாட்சி, எஸ்.செந்தில்குமாா், ஸ்ரீ.கணேஷ்பாபு உள்ளிட்டோா் பங்கேற்றனா். சித்தா பிரிவு மருத்துவா் எஸ்.கலைச்செல்வி நன்றி கூறினாா்.