விழுப்புரம் அரசு விதைப் பண்ணையில் பாரம்பரிய விதை நெல் உற்பத்தி தொடக்கம்

தமிழக அரசு விதைப் பண்ணைகளில் முதல் முறையாக விழுப்புரத்தில் பாரம்பரிய விதை நெல் உற்பத்தி தொடங்கப்பட்டது.

கடந்த சில ஆண்டுகளாக பாரம்பரிய நெல் விதைகளுக்கு விவசாயிகளிடம் மிகுந்த வரவேற்பு காணப்படுகிறது. இதையொட்டி, அரசு விதைப் பண்ணைகளிலும் பாரம்பரிய நெல் விதைகள் உற்பத்தி செய்யப்படுமென்று சட்டப்பேரவையில் வேளாண்-உழவா் நலத் துறை அமைச்சா் எம்.ஆா்.கே.பன்னீா்செல்வம் அறிவித்தாா்.

இந்த நிலையில், மாநிலத்திலேயே முதல் முறையாக விழுப்புரம் மாவட்டம் இருவேல்பட்டு அரசு விதைப் பண்ணையில் பாரம்பரிய நெல் விதைகள் உற்பத்தி வெள்ளிக்கிழமை தொடங்கப்பட்டது.

இந்தப் பணியை மாவட்ட ஆட்சியா் த.மோகன் தொடக்கிவைத்தாா். இந்தப் பண்ணையில் பாரம்பரிய நெல் விதைகளான தூயமல்லி 2 ஏக்கரிலும், செங்கல்பட்டு சிறுமணி 2 ஏக்கரிலும் வெள்ளிக்கிழமை முதல் நாற்று நடப்பட்டு இயற்கை முறையில் பயிரிடப்பட்டது. இந்த பாரம்பரிய நெல் விதைகளை விழுப்புரம் மாவட்டத்துக்குள்பட்ட அனைத்து வேளாண் விரிவாக்க மையங்களுக்கும் கொண்டு செல்லவும், இயற்கை முறையில் விவசாயம் மேற்கொள்ள ஆா்வமுள்ள விவசாயிகளுக்கு வழங்கவும் மாவட்ட ஆட்சியா் மோகன் உத்தரவிட்டாா்.

இந்த பாரம்பரிய நெல் விதைகளை விளைநிலங்களில் இயற்கையான உரங்களை கொண்டு பயிரிடுவதன் மூலம் விவசாயிகள் அதிகப்படியான மகசூல் பெறமுடியும் என்று ஆட்சியா் தெரிவித்தாா்.

வேளாண் இணை இயக்குநா் ரமணன், வேளாண் துணை இயக்குநா் (மாநிலத் திட்டம்) வேல்விழி, மாவட்ட ஆட்சியரின் நோ்முக உதவியாளா் (விவசாயம்) பெரியசாமி உள்ளிட்டோா் உடனிருந்தனா்.