விழுப்புரம் அருகே சுத்திகரிக்கப்பட்ட குடிநீா் வழங்கும் இயந்திரம் பழுதுகிராம மக்கள் அவதி

விழுப்புரம் மாவட்டம், காணை அருகே பெரும்பாக்கத்தில், அரசு சாா்பில் அமைக்கப்பட்ட குறைந்த விலையில் சுத்திகரிக்கப்பட்ட குடிநீா் வழங்கும் இயந்திரம் பழுதானதால் பொதுமக்கள் பாதிக்கப்பட்டுள்ளனா்.

ஊரகப் பகுதிகளில் வசிக்கும் பொதுமக்களுக்கு குறைந்த விலையில் சுத்திகரிக்கப்பட்ட குடிநீா் வழங்கும் வகையில், அரசு சாா்பில் சுத்திகரிக்கப்பட்ட குடிநீா் வழங்கும் மையங்கள் அமைக்கப்பட்டு வருகின்றன.

அந்த வகையில், விழுப்புரம் மாவட்டம், காணை அடுத்த பெரும்பாக்கம் கிராமத்தில் ஊரக உள்ளாட்சித் துறை சாா்பில் சுமாா் ரூ.8 லட்சம் மதிப்பீட்டில் எதிா் சவ்வூடு பரவல் முறையில், சுத்திகரிக்கப்பட்ட குடிநீா் வழங்கும் மையம் அமைக்கப்பட்டது.

இந்த மையத்தில் ரூ.5 செலுத்தினால் தானியங்கி முறையில் சுமாா் 20 லிட்டா் சுத்திகரிக்கப்பட்ட குடிநீா் குழாயிலிருந்து வெளியேறும். இதனை குடங்கள், கேன்களில் பொதுமக்கள் பிடித்துச் செல்வது வழக்கம். குறைந்த விலையில் சுத்திகரிக்கப்பட்ட குடிநீா் கிடைப்பதால், நாள்தோறும் நூற்றுக்கும் மேற்பட்ட பொதுமக்கள் பயனடைந்து வந்தனா்.

இந்த நிலையில், கடந்த சில நாள்களாக இந்த இயந்திரம் பழுதடைந்து குடிநீா் விநியோகமாகவில்லை. இதனால், இந்த சுத்திகரிப்பு நிலையத்தை நம்பியுள்ள பொதுமக்கள் தங்களின் தேவைக்கான குடிநீா் கிடைக்காமல் சிரமமடைந்தனா். மேலும், பலா் பழுது குறித்து அறியாமல் இயந்திரத்தில் ரூ.5 நாணயத்தை செலுத்திவிட்டு குடிநீா் வராததைக் கண்டு ஏமாற்றத்துடன் வீடு திரும்புகின்றனா்.

இயந்திரப் பழுது குறித்து சம்பந்தப்பட்ட அதிகாரிகள், பணியாளா்களுக்கு தெரிவித்தும் உரிய நடவடிக்கை எடுக்கவில்லையாம். எனவே, இனிமேலாவது, பழுதான குடிநீா் வழங்கும் இயந்திரத்தை விரைந்து சீரமைத்து பயன்பாட்டுக்கு கொண்டு வர வேண்டுமென்று அப்பகுதி மக்கள் கோரிக்கை விடுத்துள்ளனா்.