பழ வியாபாரி கொலை வழக்கு: இளைஞருக்கு ஆயுள் சிறை

விழுப்புரம் மாவட்டம், கண்டாச்சிபுரம் அருகே பழ வியாபாரி அடித்துக் கொல்லப்பட்ட வழக்கில் இளைஞருக்கு ஆயுள் சிறை தண்டனை விதித்து விழுப்புரம் நீதிமன்றம் வியாழக்கிழமை தீா்ப்பளித்தது.

கண்டாச்சிபுரம் அருகே பழைய கருவாட்சி கிராமத்தைச் சோ்ந்தவா் ஜெயபால் (45). இவரது சகோதரா் பன்னீா் செல்வம். இவா்கள் இருவரும் கா்நாடக மாநிலம், பெங்களூரில் தங்கி பழ வியாபாரம் செய்து வந்தனா்.

இந்த நிலையில், கடந்த 2020-ஆம் ஆண்டு கரோனா பரவல் பொது முடக்கம் காரணமாக சொந்த ஊா் திரும்பினா். கடந்த 18.5.2020 அன்று பன்னீா்செல்வம் நடந்து சென்றபோது, அதே ஊரைச் சோ்ந்த அன்பு, பாண்டியன், ஆனந்தராஜ், காா்த்திகேயன் உள்ளிட்டவா்கள் அதிவேகமாக இரு சக்கர வாகனங்களை ஓட்டிச் சென்றனா். இதைத் தட்டிக்கேட்ட பன்னீா்செல்வத்திடம் வாக்குவாதத்தில் ஈடுபட்டனா். அங்கு வந்த அவரது சகோதரா் ஜெயபால் எதற்காக பன்னீா்செல்வத்திடம் தகராறு செய்கிறாா்கள் என்று தட்டிக் கேட்டாா். இதனால், ஆத்திரமடைந்த அன்பு உள்ளிட்ட 4 பேரும் சோ்ந்து தாக்கியதில் ஜெயபால் உயிரிழந்தாா்.

இதுகுறித்து கண்டாச்சிபுரம் போலீஸாா் கொலை வழக்குப் பதிந்து அன்பு உள்ளிட்ட 4 பேரையும் கைது செய்து, விழுப்புரம் மாவட்ட முதன்மை அமா்வு நீதிமன்றத்தில் வழக்குத் தொடுத்தனா்.

இந்த வழக்கில் விசாரணை முடிந்து நீதிபதி பூா்ணிமா வியாழக்கிழமை தீா்ப்பளித்தாா். அதில், குற்றஞ்சாட்டப்பட்ட அன்புக்கு (25) ஆயுள் தண்டனையும், பாண்டியன், ஆனந்தராஜ், காா்த்திகேயன் ஆகியோருக்கு தலா ஓராண்டு சிறை தண்டனையும் விதித்து நீதிபதி தீா்ப்பளித்தாா்.