புயல் நிவாரணத் தொகையாக ரூ.10 ஆயிரம் வழங்க வேண்டும்: உ.வாசுகி

புயல் நிவாரணத் தொகையை ரூ.10 ஆயிரமாக உயா்த்தி வழங்க வேண்டும் என்று மாா்க்சிஸ்ட் கம்யூனிஸ்ட் கட்சியின் மத்திய குழு உறுப்பினா் உ.வாசுகி தெரிவித்தாா்.

ஃபென்ஜால் புயலால் பாதிக்கப்பட்ட விழுப்புரம் மாவட்டத்தின் மரக்காணம், வானூா், திண்டிவனம், மயிலம், விக்கிரவாண்டி பகுதிகளை மாா்க்சிஸ்ட் கம்யூனிஸ்ட் மத்திய குழு உறுப்பினா்கள் உ.வாசுகி, ப.சண்முகம், மாநிலக் குழு உறுப்பினா் டி.ரவீந்திரன் ஆகியோா் கொண்ட குழுவினா் புதன்கிழமை பாா்வையிட்டனா். பின்னா், விழுப்புரம் கட்சி அலுவலகத்தில் உ.வாசுகி செய்தியாளா்களுக்கு அளித்த பேட்டி:

ஃபென்ஜால் புயல் வெள்ளத்தால் விழுப்புரம் மாவட்டத்தில் மிகப் பெரிய அளவிலான சேதம் ஏற்பட்டிருக்கிறது. சுமாா் 2.50 லட்சம் ஏக்கா் பரப்பிலான சாகுபடி நிலங்கள் நீரில் மூழ்கியுள்ளன. மரக்காணத்தில் சுமாா் 2,500 ஏக்கா் உப்பளங்கள் நீரில் மூழ்கியுள்ளன. இதனால், இன்னும் 5 மாதங்களுக்கு உப்பளத் தொழிலாளா்களுக்கு வேலையில்லாத நிலை ஏற்பட்டுள்ளது. எனவே, அவா்களுக்கு மாதம் ரூ.5,000 வீதம் 5 மாதங்களுக்கு ரூ.25 ஆயிரத்தை நிவாரணத் தொகையாக வழங்க வேண்டும்.

நெல் பயிருக்கு ஏக்கருக்கு ரூ.30 ஆயிரம் நிவாரணத் தொகை வழங்க வேண்டும். அதுபோல, உயிரிழந்தவா்களின் குடும்பங்களுக்கு ரூ.10 லட்சம் நிவாரணம் வழங்க வேண்டும். சவுக்குக்கு இழப்பீடு வழங்க வேண்டும்.

ரூ.10 ஆயிரம் வழங்க வேண்டும்: வெள்ளத்தால் பாதிக்கப்பட்ட குடும்ப அட்டைதாரா்களுக்கு ரூ.2 ஆயிரம் வழங்கப்படும் என்று மாநில அரசு அறிவித்துள்ளது. வீட்டு உபயோகப் பொருள்கள் அனைத்தும் சேதமடைந்த நிலையில், அவா்களுக்கு ரூ.2 ஆயிரம் வழங்கப்படுவது ஏற்கத்தக்கது அல்ல. எனவே, குடும்ப அட்டைதாரா்களுக்கு நிவாரணத் தொகையாக ரூ.10 ஆயிரம் வழங்க வேண்டும்.

மாநில அரசே மொத்தமாக அனைத்து நிதியுதவிகளையும் வழங்கும் என எதிா்பாா்க்காமல், தேசிய பேரிடா் நிதியிலிருந்து மத்திய அரசு நிதியை வழங்க வேண்டும். முதல் தவணையாக மாநில அரசு கோரிய ரூ.2,000 கோடியை மத்திய அரசு உடனடியாக விடுவிக்க வேண்டும்.

வட்டியில்லா கடன்: ஆண்டுதோறும் இதுபோன்ற பேரிடா் சம்பவங்களால் பாதிப்புகள் நிகழ்கின்றன. இதற்கு நிரந்தரத் தீா்வை அரசு ஏற்படுத்த வேண்டும். மேட்டூா் அணை முதல் அனைத்து இடங்களிலும் அணைகள், வாய்க்கால்கள், கால்வாய்களை தூா்வாரும் பணியை மேற்கொள்ள வேண்டும்.

கேரள மாநிலம், வயநாட்டில் நிலச்சரிவால் பாதிக்கப்பட்ட மக்களுக்கு அந்த மாநில அரசு ரூ.ஒரு லட்சம் வட்டியில்லா கடன் வழங்கிய நிலையில், தமிழக அரசும் வெள்ளத்தால் பாதிக்கப்பட்ட மக்களுக்கு வட்டியில்லாமல் ரூ.ஒரு லட்சம் கடனுதவி வழங்க வேண்டும் என்றாா் அவா்.

பேட்டியின்போது, முன்னாள் எம்எல்ஏ ஆா்.ராமமூா்த்தி, மாவட்டச் செயலா் என்.சுப்பிரமணியன், விவசாய சங்க மாவட்டச் செயலா் முருகன் உள்ளிட்டோா் உடனிருந்தனா்.