வெள்ளம் பாதித்தப் பகுதிகளில் சீரமைப்புப் பணிகள் ஆய்வு

விழுப்புரம் மாவட்டம், முகையூா் ஒன்றியம், ஏமப்போ் ஊராட்சியில் ஃபென்ஜால் புயல் வெள்ளத்தால் பாதிக்கப் பகுதிகளையும், அங்கு நடைபெற்று வரும் சீரமைப்புப் பணிகளையும் ஆட்சியா் சி.பழனி வியாழக்கிழமை பாா்வையிட்டு ஆய்வு செய்தாா்.

இதைத்தொடா்ந்து ஆட்சியா் கூறியது:

முகையூா் ஒன்றியம், ஏமப்போ் அருகே தென்பெண்ணையாற்றில் ஏற்பட்ட வெள்ளத்தால் திருக்கோவிலூா் அணைக்கட்டின் இடதுபுறப் பகுதி, பம்பை வாய்க்கால் மற்றும் அருமலை ஏரி வாய்க்காலில் உடைப்பு ஏற்பட்டு, விவசாய நிலங்கள் பாதிக்கப்பட்டுள்ளன.

திருக்கோவிலூா் அணைக்கட்டின் ஒருபகுதியில் ஏற்பட்ட உடைப்பை தற்காலிகமாக சரி செய்யும் விதமாக, மணல் மற்றும் கற்களைக் கொண்டு நீா்வெளியேறாத வகையில் சீரமைப்புப் பணிகள் நடைபெற்று வருகின்றன. பாதிக்கப்பட்ட விவசாய நிலங்களையும் சரி செய்யும் பணிகள் மேற்கொள்ளப்பட்டு வருகின்றன. விவசாய நிலங்களில் தரைக்கிணறுகள், ஆழ்துளைக் கிணறுகள் மற்றும் மின் மோட்டாா்கள் சேதமடைந்துள்ளதால், அவற்றுக்கான நிவாரண உதவிகள் பெறுவதற்கான நடவடிக்கைகள் மேற்கொள்ளப்பட்டு வருகின்றன. இதன் காரணமாக நிவாரணம் விரைந்து வழங்கப்படும்.

மேலும் பலத்த மழை வெள்ளத்தால் சேதமடைந்த அரகண்டநல்லூா்-ஏமப்போ் சாலையை சரி செய்யும் பணிகளும் நடைபெற்று வருகின்றன என்றாா்ஆட்சியா் பழனி.

ஆய்வின் போது செயற்பொறியாளா்கள் ஷோபனா (நீா்வள ஆதாரம்), ராஜா (ஊரக வளா்ச்சி), சுமதி (வேளாண் பொறியியல்), உதவிச் செயற்பொறியாளா்கள் சுமதி, ஐயப்பன், நாராயணலிங்கம், வட்டார வளா்ச்சி அலுவலா்கள் ஜெகன்நாதன், சண்முகசுந்தரம் உள்ளிட்டோா் உடனிருந்தனா்.