போக்குவரத்துக் கழக ஓய்வு பெற்றோா் வாயில் கருப்புத் துணி கட்டி ஆா்ப்பாட்டம்

விழுப்புரம்: தங்களின் பல்வேறு கோரிக்கைககளுக்குத் தமிழக முதல்வா் தீா்வு காண வலியுறுத்தி, தமிழ்நாடு அரசுப் போக்குவரத்துக் கழக ஓய்வு பெற்றோா் நல அமைப்பினா் செவ்வாய்க்கிழமை வாயில் கருப்புத் துணி கட்டிக்கொண்டு ஆா்ப்பாட்டத்தில் ஈடுபட்டனா்.

109 மாத நிலுவையுடன்அகவிலைப்படி உயா்வுத் தொகையை ஓய்வு பெற்ற போக்குவரத்துத் தொழிலாள ா்களுக்கு வழங்க வேண்டும். 21 மாத பணப் பலன்களை வழங்க வேண்டும். ஓய்வு பெறும் நாளில் போக்குவரத்துத் தொழிலாளா்களுக்கு பணப்பலன்களை வழங்க வேண்டும். பழைய ஓய்வூதியத் திட்டத்தை அமல்படுத்த வேண்டும், வாரிசுகளுக்கு வேலை வழங்க வேண்டும், மருத்துவக் காப்பீடு வழங்க வேண்டும் என்பன போன்ற கோரிக்கைகளை வலியுறுத்தி இந்த ஆா்ப்பாட்டம் நடத்தப்பட்டது.

இந்த ஆா்ப்பாட்டத்துக்கு அமைப்பின் விழுப்புரம் தலைவா் ஜி. பாலகிருஷ்ணன் தலைமை வகித்தாா். பொதுச் செயலா் டி.ராமமூா்த்தி வரவேற்றுப் பேசினாா். தமிழ்நாடு அரசுப் போக்குவரத்துக் கழக ஓய்வு பெற்றோா் நல அமைப்பின் மாநிலப் பொதுச் செயலா் கே.கா்சன் கண்டன உரையாற்றினாா்.

கூட்டமைப்பின் விழுப்புரம் மாவட்டத் தலைவா் எம்.புருஷோத்தமன், செயலா் கே. அய்யாக்கண்ணு, கள்ளக்குறிச்சி மாவட்ட ஒருங்கிணைப்பாளா் அய்யாமோகன், மாவட்டத் தலைவா் டி. கிருஷ்ணசாமி, மாவட்டச் செயலா் கேசவராமானுஜம், பள்ளிக் கல்வித் துறை சங்கத்தைச் சோ்ந்த பி.தியாகராஜன், தொலைத்தொடா்பு ஊழியா் சங்கத்தின் என்.மேகநாதன் ஆகியோா் வாழ்த்துரை வழங்கினா். நிறைவில், அமைப்பின் துணைப் பொதுச் செயலா் துளசிங்கம் நன்றி கூறினாா்.