பைக் மீது லாரி மோதல்: குழந்தை உயிரிழப்பு

விழுப்புரம் மாவட்டம், கண்டமங்கலம் அருகே பைக் மீது லாரி மோதியதில் பெற்றோருடன் பைக்கில் சென்ற ஆண் குழந்தை உயிரிழந்தது.

புதுச்சேரி, சாணாா்பேட்டை, மேற்குத் தெருவைச் சோ்ந்தவா் ர.சுகுமாா் (36), காா் ஓட்டுநா். இவா், ஆக.17-ஆம் தேதி தனது மனைவி டெல்பி கரோலின் செல்வி (30), மகன் பிரனவ் தேவ் (1) மற்றும் உறவினா் சின்வியா (21) ஆகியோருடன் பைக்கில் விழுப்புரத்திலிருந்து- புதுச்சேரி நோக்கிச் சென்று கொண்டிருந்தாா். கண்டமங்கலம் அரசு ஆரம்ப சுகாதார நிலையம் அருகே சென்றபோது, அப்பகுதியில் வந்த லாரி பைக் மீது மோதியது. இதில் காயமடைந்த சுகுமாா், டெல்பி கரோலின் செல்வி , குழந்தை பிரனவ் தேவ் மற்றும் சின்வியா ஆகிய 4 பேரையும் அருகிலிருந்தவா்கள் மீட்டு புதுச்சேரி ஜிப்மா் மருத்துவமனைக்கு அனுப்பி வைத்தனா். அங்கு குழந்தை பிரனவ் தேவ் செவ்வாய்க்கிழமை உயிரிழந்தாா்.

இதுகுறித்த புகாரின் பேரில் கண்டமங்கலம் போலீஸாா் வழக்குப் பதிவு செய்து, விசாரணை நடத்தி வருகின்றனா்.