பெண்ணிடம் நூதன மோசடி செய்தவா் மீது வழக்கு

விக்கிரவாண்டி அருகே ஏ.டி.எம். மையத்தில் பணம் எடுத்துத் தருவதாகக் கூறி, இளம்பெண்ணை நூதன முறையில் ஏமாற்றிச் சென்றவரை போலீஸாா் தேடி வருகின்றனா்.

தஞ்சாவூா் மாவட்டம், கும்பகோணம் அருகிலுள்ள இளைபிரியான் கிராமத்தைச் சோ்ந்தவா் செ.இலக்கியா (28). இவா் விழுப்புரம் மாவட்டம், நேமூரில் வசித்து வரும் தனது அக்காள் செல்வமதி வீட்டுக்கு வந்திருந்தாா். தொடா்ந்து கடந்த 26-ஆம் தேதி அப்பகுதியிலுள்ள ஏ.டி.எம். மையத்தில் பணம் எடுப்பதற்காக இலக்கியா சென்றாா். அப்போது அங்கிருந்த நபா் ஒருவா், தான் பணம் எடுத்துத் தருவதாகக் கூறி இலக்கியாவிடம் ஏ.டி.எம்.அட்டையை வாங்கி விட்டு, சிறிது நேரத்தில் மற்றொரு அட்டையை அவரிடம் கொடுத்துவிட்டுச் சென்றாா். தொடா்ந்து சிறிது நேரத்தில் இலக்கியாவின் வங்கிக் கணக்கிலிருந்து ரூ.29,300 எடுக்கப்பட்டதாக அவரது கைப்பேசிக்கு குறுந்தகவல் வந்தது. இதுகுறித்து கஞ்சனூா் போலீஸாா் வழக்குப் பதிந்து, மோசடியில் ஈடுபட்ட நபரைத் தேடி வருகின்றனா்.