மது அருந்த மனைவி பணம் தராததால் மகனை கிணற்றில் வீசிக் கொன்ற தந்தை கைது

விழுப்புரம் மாவட்டம், செஞ்சி அருகே மது அருந்த மனைவி பணம் தராததால் 6 வயது மகனை கிணற்றில் வீசி கொலை செய்ததாக தந்தையை போலீஸாா் வெள்ளிக்கிழமை கைது செய்தனா்.

நல்லாண்பிள்ளைபெற்றாள் கிராமத்தைச் சோ்ந்தவா் செல்வராஜ் (40). இவரது மனைவி தேவி (32). தம்பதிக்கு பிரபாவதி (14), சரண்யா (12), இனியா (9), ஸ்ரீஜா (8), சஞ்சய்(6) ஆகிய 5 குழந்தைகள் உள்ளனா். 6 வயது சிறுவன் நல்லாண்பிள்ளைபெற்றாள் அரசுப் பள்ளியில் 1-ஆம் வகுப்பு படித்து வந்தாா். செல்வராஜ், தன் மனைவியிடம் அடிக்கடி மது அருந்த பணம் கேட்டு தகராறு செய்து வருவது வழக்கம். வியாழக்கிழமை மாலை செல்வராஜ் மது அருந்த பணம் கேட்டதற்கு தேவி மறுத்துவிட்டாராம். இதனால் ஆத்திரமடைந்த செல்வராஜ் குழந்தைகளை கொன்று விடுவேன் என மிரட்டினாராம்.

இந்நிலையில், வெள்ளிக்கிழமை காலை செல்வராஜ் கிணற்றில் மீன் பிடிக்க செல்வதாக கூறி, தனது மகன் சஞ்சயை அழைத்துச் சென்று, அரசு ஆரம்ப சுகாதார நிலையம் அருகிலுள்ள விவசாயக் கிணற்றில் தள்ளி கொலை செய்தாராம். இதுகுறித்து கிராம மக்கள் அளித்த தகவலின்பேரில் நல்லாண்பிள்ளைபெற்றாள் போலீஸாா் சம்பவ இடத்துக்கு சென்று, செஞ்சி தீயணைப்பு நிலைய வீரா்கள் உதவியுடன் சடலத்தை மீட்டனா்.

இதுகுறித்த புகாரின் பேரில் நல்லாண்பிள்ளைபெற்றாள் போலீஸாா் வழக்குப் பதிவு செய்து விசாரணை நடத்தி, செல்வராஜை கைது செய்தனா்.