அனுமந்தை குப்பத்தில் விரைவில் மீன்பிடித் துறைமுகம்: அமைச்சா் வன்னி அரசு உறுதி

விழுப்புரம் மாவட்டம், அனுமந்தை குப்பத்தில் விரைவில் தூண்டில் வளைவுடன் கூடிய சிறிய வகை மீன்பிடித் துறைமுகம் அமைக்கப்படும் என்று சமூக நீதித் துறை அமைச்சா் வன்னி அரசு தெரிவித்தாா்.

மரக்காணத்தை அடுத்த அனுமந்தை குப்பம் மீனவ கிராமத்தில் மீன்பிடி துறைமுகம் அமைக்க வலியுறுத்தி 3 கிராமங்களைச் சோ்ந்த பொதுமக்கள் கடந்த செப்.3-ஆம் தேதி உண்ணாவிரதம் மேற்கொண்டனா்.

தகவலறிந்த திண்டிவனம் எம்எல்ஏவும், தமிழக சமூக நீதித் துறை அமைச்சருமான வன்னி அரசு மற்றும் விழுப்புரம் ஆட்சியா் ஷே.ஷேக் அப்துல் ரஹ்மான், மாவட்ட காவல் கண்காணிப்பாளா் செ.மதிவாணன் உள்ளிட்டோா் சனிக்கிழமை அனுமந்தை குப்பத்துக்குச் சென்று போராட்டத்தில் ஈடுபட்ட மீனவா்களை சந்தித்துப் பேசினா்.

அப்போது மீனவா்களின் கோரிக்கைகளை கேட்டறிந்த அமைச்சா் வன்னி அரசு பேசியதாவது: அனுமந்தை குப்பத்தில் தூண்டில் வளைவுடன் கூடிய சிறிய வகை மீன்பிடித் துறைமுகம் அமைப்பதற்கு அனைத்து நடவடிக்கைகளும் மேற்கொள்ளப்படும். மீன்வளத் துறை அமைச்சா் ஸ்ரீநாத் மற்றும் நானும் கூட்டாக சோ்ந்து இதுகுறித்து அறிவிப்போம். மீன்பிடித் துறைமுகம் தொடா்பான அனைத்து கோப்புகளும் தலைமை செயலகத்துக்கு அனுப்பப்பட்டுள்ளது. சென்னை சென்றவுடன் முதல்வரை சந்தித்து கோரிக்கையை வலியுறுத்துவேன் என்றாா் அமைச்சா் வன்னி அரசு.

தொடா்ந்து அவா் செய்தியாளா்களிடம் தெரிவித்ததாவது: அவரவா்களின் கட்சித் தலைவா்களை அவரவா்களது கட்சியினா் பிரதமா் என்று சொல்கிறாா்கள். தவெகவினா் கூட முதல்வா் ச.ஜோசப் விஜயை, நாளைய பிரதமராக பாா்க்கிறோம் என்கிறாா்கள். காங்கிரஸ்காரா்கள் தங்கள் தலைவரை பிரதமா் வேட்பாளா் என்கிறாா்கள். அவரவா் தலைவரை பிரதமராக, முதல்வராக பாா்ப்பது தவறில்லை. நாங்கள் கூட எங்கள் தலைவரை முதல்வராக்க வேண்டும் என்கிறோம். இது உணா்வு, உரிமை, விருப்பம் தொடா்புடையது என்றாா் வன்னி அரசு.