மாட்டு வியாபாரி கொலை: அண்ணன், தம்பி குண்டர் சட்டத்தில் கைது

திண்டுக்கல் அருகே மாட்டு வியாபாரி கொலை வழக்கில் தொடர்புடைய அண்ணன், தம்பி இருவரை, குண்டர் தடுப்புச் சட்டத்தின் கீழ் சிறையில் அடைக்க புதன்கிழமை மாவட்ட ஆட்சியர் டி.ஜி.வினய் உத்தரவிட்டுள்ளார்.
திண்டுக்கல் மாவட்டம், விஎஸ்.கோட்டை அடுத்துள்ள மார்க்கம்பட்டியைச் சேர்ந்தவர் மு.சக்தி என்ற சக்திவேல் (50). இவரது சகோதரர் பாண்டி என்ற பாண்டியன் (49). கடந்த பிப்ரவரி மாதம், அதே பகுதியைச் சேர்ந்த மாட்டு வியாபாரி அம்பல்ராஜ் என்பவரை கொலை செய்த வழக்கில், அண்ணன், தம்பி இருவரையும் சாணார்பட்டி போலீஸார் கைது செய்து, திண்டுக்கல் மாவட்ட சிறையில் அடைத்தனர்.
இந்நிலையில், சக்திவேல் மற்றும் பாண்டி  இருவரையும் குண்டர் தடுப்புச் சட்டத்தின் கீழ் சிறையில் அடைக்க மாவட்ட காவல் கண்காணிப்பாளர் இரா.சக்திவேல் பரிந்துரை செய்ததை ஏற்று, மாவட்ட ஆட்சியர் டி.ஜி.வினய் அதற்கான உத்தரவை புதன்கிழமை பிறப்பித்துள்ளார். இதனை அடுத்து, திண்டுக்கல் சிறையில் இருந்த இருவரும், மதுரை மத்திய சிறைக்கு மாற்றப்பட்டனர்.