தேனா வங்கி லாபம் பாதியாகக் குறைவு

கடந்த ஜனவரி முதல் மார்ச் வரையிலான 3 மாத காலத்தில் பொதுத்துறை வங்களில் ஒன்றான தேனா வங்கியின் லாபம் ரூ.125.67 கோடியாகவுள்ளது. கடந்த ஆண்டின் இதே காலகட்டத்துடன் ஒப்பிடும்போது இது பாதிக்கும் குறைவாகும்.

2011-12-ம் நிதியாண்டில் ஜனவரி முதல் மார்ச் வரையிலான காலாண்டில் தேனா வங்கியின் நிகர லாபம் ரூ.254.79 கோடியாக இருந்தது. 2012-13-ம் ஆண்டு ஜனவரி முதல் மார்ச் வரையிலான காலகட்டத்தில் நிகர லாபம் ரூ.125.67 கோடியாகக் குறைந்துள்ளது. அதே நேரத்தில் வங்கியின் மொத்த வருவாய் உயர்ந்துள்ளது. ஜனவரி முதல் மார்ச் வரையிலான காலாண்டில் மொத்த வருவாய் ரூ.2,539.74 கோடியாகும். கடந்த ஆண்டு இதே காலகட்டத்தில் இது ரூ.2,166.36 கோடியாக இருந்தது.

அதே நேரத்தில் கடந்த ஆண்டில் ரூ.803.14 கோடியாக இருந்த லாபம், இந்த ஆண்டில் ரூ.810.14 கோடியாக அதிகரித்துள்ளது. வங்கியின் மொத்த வருவாய் ரூ.7,376.30 கோடியில் இருந்து, ரூ.9,554.85 கோடியாக உயர்ந்துள்ளது. மும்பை பங்குச் சந்தையில் தேனா வங்கி பங்கின் விலை 0.91 உயர்ந்து ரூ.93.90 ஆக உள்ளது.