கிராமி விருதுக்குப் பரிந்துரைக்கப்பட்ட பாடகர், கரோனா வைரஸ் தொற்றால் மரணம்

கிராமி விருதுக்குப் பரிந்துரைக்கப்பட்ட பாடகரான டிராய் ஸ்னீட், கரோனா வைரஸ் தொற்றால் மரணம் அடைந்துள்ளார். அவருக்கு வயது 52.

சீனாவின் வூஹான் நகரிலிருந்து பரவத் தொடங்கிய கரோனா வைரஸ் தற்போது உலகையே அச்சுறுத்தி வருகிறது. உலகம் முழுவதும் பரவியுள்ள இந்த வைரஸால் இதுவரை 2 லட்சத்து 11 ஆயிரத்துக்கும் மேற்பட்டோா் உயிரிழந்துவிட்டனா். இந்தியாவைப் பொறுத்தவரை இதுவரை 29,400 பேருக்கு மேல் இந்த வைரஸின் பாதிப்பு உறுதி செய்யப்பட்டுள்ளது.

இந்நிலையில் கிராமி விருதுக்குப் பரிந்துரைக்கப்பட்ட பாடகரான டிராய் ஸ்னீட், கரோனா வைரஸ் தொற்றால் மரணம் அடைந்துள்ளார். கரோனா வைரஸ் தொற்றால் பாதிக்கப்பட்ட டிராய், பிளோரிடாவில் உள்ள மருத்துவமனையில் சிகிச்சை பலனின்றி உயிரிழந்ததாக டிராயின் மக்கள் தொடர்பாளர் பில் கார்பென்டர் தகவல் தெரிவித்துள்ளார்.

1999-ல் வெளியான ஹையர் ஆல்பத்துக்காக கிராமி விருதுக்குப் பரிந்துரைக்கப்பட்டார் டிராய் ஸ்னீட்.