சாதி, மதத்துக்கு எதிராக வாக்களிக்க வேண்டும் என்பதே என் நிலைப்பாடு: விஜய் சேதுபதி

தமிழகத்தில் 234 பேரவைத் தொகுதிகளுக்கும் ஒரே கட்டமாக இன்று வாக்குப் பதிவு நடைபெற்று வருகிறது. மாநிலம் முழுவதும் உள்ள 37 ஆயிரம் இடங்களில் உள்ள 88,937 வாக்குச் சாவடிகளிலும் தகுந்த போலீஸ் பாதுகாப்பு ஏற்பாடுகள் செய்யப்பட்டுள்ளன. 

இன்று காலை முதல் திரையுலகப் பிரபலங்கள் ஆர்வத்துடன் வாக்களித்து வருகிறார்கள். 

கோடம்பாக்கத்தில் உள்ள வாக்குச்சாவடியில் வாக்களித்தார் நடிகர் விஜய் சேதுபதி. பிறகு நடைபெற்ற செய்தியாளர் சந்திப்பில், சாதி, மதத்துக்கு எதிராக வாக்களிக்க வேண்டும் என்று கூறினீர்களே என செய்தியாளர் ஒருவர் அவரிடம் கேள்வி எழுப்பினார். அதற்கு விஜய் சேதுபதி கூறியதாவது:

சாதி, மதத்துக்கு எதிராக வாக்களிக்க வேண்டும் என்பது நான் 2019-ல் சொன்னது. எப்போதும் அதுதான் என் நிலைப்பாடு. என்னைப் பொறுத்தவரை மனிதன் தான் முக்கியம். மனிதன் தான் எல்லாமே என்றார்.