பிரபல தெலுங்கு நடிகர் அல்லு அர்ஜுனுக்கு கரோனா பாதிப்பு

பிரபல தெலுங்கு நடிகர் அல்லு அர்ஜுன் கரோனா வைரஸ் தொற்றால் பாதிக்கப்பட்டுள்ளார்.

2003-ல் கங்கோத்ரி என்கிற தெலுங்குப் படத்தின் மூலம் கதாநாயகனாக அறிமுகமானார் அல்லு அர்ஜுன். நடிகர் சிரஞ்சீவியின் உறவினர். ஏராளமான தெலுங்குப் படங்களில் நடித்து முன்னணி நடிகராக உள்ளார்.

இந்நிலையில் கரோனாவால் பாதிக்கப்பட்டுள்ளார் அல்லு அர்ஜுன். இதுபற்றி அவர் கூறியதாவது:

கரோனாவால் பாதிக்கப்பட்டுள்ள நான் வீட்டில் தனிமைப்படுத்திக்கொண்டுள்ளேன். அனைத்து பாதுகாப்பு வழிமுறைகளையும் பின்பற்றி வருகிறேன். என்னுடன் தொடர்பில் இருந்தவர்கள் பரிசோதித்துக் கொள்ளுங்கள். பாதுகாப்புடன் இருங்கள். தடுப்பூசி செலுத்திக்கொள்ளுங்கள். என்னுடைய ரசிகர்கள் என்னைப் பற்றி கவலைப்பட வேண்டாம். நான் நலமாக உள்ளேன் என்று கூறியுள்ளார்.