நடிகர் அஜித்தின் வலிமையுடன் மோதும் பிரம்மாண்ட படம் : வெளியீட்டுத் தேதி அறிவிப்பு

பொங்கலை முன்னிட்டு நடிகர் அஜித்தின் வலிமையுடன், ராஜமௌலியின் ஆர்ஆர்ஆர் படமும் வெளியாகவுள்ளது. 

நடிகர் அஜித் குமார் நடிப்பில் உருவாகியிருக்கும் வலிமை திரைப்படம் அடுத்த ஆண்டு பொங்கலுக்கு வெளியாகிறது. வினோத் இயக்கத்தில் உருவாகியுள்ள இந்தப் படத்தில் இருந்து கிளிம்ப்ஸ் விடியோ சமீபத்தில் வெளியாகி படத்தின் மீதான எதிர்பார்ப்பை அதிகரித்திருந்தது. 

இந்த நிலையில் ராஜமௌலி இயக்கத்தில் ஜூனியர் என்.டி.ஆர், ராம் சரண் இணைந்து நடித்துள்ள ஆர்ஆர்ஆர் படத்தின் வெளியீடு இன்று(அக்டோபர் 2) அறிவிக்கப்பட்டது. அதன்படி இந்தப் படம் அடுத்த ஆண்டு ஜனவரி 7 ஆம் தேதி வெளியாகவுள்ளது. பொங்கல் விடுமுறையை முன்னிட்டு ஒரு வாரம் முன்னதாக இந்தப் படம் வெளியாகிறது. 

வலிமை மற்றும் ஆர்ஆர்ஆர் என மிகப் பெரிய படங்கள் பொங்கலை முன்னிட்டு வெளியாகவுள்ளதால் போட்டி கடுமையாக இருக்கும் என்று எதிர்பார்க்கப்படுகிறது. மேலும், நடிகர் விஜய்யின் பீஸ்ட் மற்றும் நடிகர் சூர்யாவின் எதற்கும் துணிந்தவன் ஆகிய படங்களின் வெளியீட்டுத் தேதியும் இன்னும் அறிவிக்கப்படவில்லை என்பது குறிப்பிடத்தக்கது.